Iluliarsuit ukiut marluk qaangiuppata nungussimasinnaapput
Hotel Arcticip aneerasaartarfia tusagassiortunik Professor Dorthe Dahl-Jensenimik tusarnaariartunik ullaap tungaa ulikkaarpoq. Nunaqavissutut tusaasat aamma ernumaammernartoqarput, ingammik oqaatigimmagu ukiuni aggersuni isseqassanngippat taava Nunatta takornarianut ussassaarutai pingaarnerit, iluliarsuit, ukiut marluk qaangiuppata nungussimassasut.
Taamaammallu Connie Hedegaard ima oqarpoq:
Tikeraartut amerlanersaat angerlaqqittarput eqqarsarlutik arraa iliuuseqapallattariaqarpugut.
Arlalissuit nunatsinnut takornariartereerlugit qanoq alloriaqqissanersoq avatangiisinut ministeri Connie Hedegaard aperigatsigu, aamma oqarpoq, Sila avatangiisillu pillugit Københavnimi 2009-mi ataatsimeersuartitsinermi nutaamik isumaqatigiissummik pilersitsisoqarnissaa angorusullugu, pingaarnertullu tamanut paasitikkusuppaa, sila massakkorluinnaq allanngormat.
Angela Merkelilumi arnaavoq avataaniit maluginiarneqarluartoq, Angelap nukittoqqutigaattaaq Sila avatangiisillu ilisimasaqarfigilluareeramigit, tassami avatangiisinut ministeriunerata nalaani Kyotomi isumaqatigiissut CO2-mik annikillisitsisussaaq sunniuteqaqataaffiginikuummagu.
Suleqataasimaneralumi aallaaviulluarsinnaavoq Angela Merkelip ullumikkorpiaq Ilulissaniinneranut, nammineerluni takuniarlugu ukiuni tallimani sermip killeqarfia 15 kilometerinik ilorpartersimasoq. Imaaniit uukkarunnaarluni nunami uukkartalernermigut iluliarsuit sequtserlutik imaanut annguttalersimammata.
Angela Merkelilumi Connie Hedegaardimut ikiortaalissaaq, piffissami qaninnermi Kina, Indien, Japanilu naapisimaalerunigit silap allanngoriartornera iliuuseqarfigineqartariaqartoq aamma taakkununnga apuunniaramiuk.
Kansleri Angela Merkel ullaap tungaa sermimukarpoq, politikereqatini kalaallit danskillu ingiaqatigalugit.
