Iluliarsuit nassitsissutilersorneqarput

Norgemiu issittumi ilisimasassarsiortartoq, silallu pissusaata allanngoriartorneranut ilisimatooq, Knut Solberg, Nunatta kitaata sineriaani satellitinut nassitsissutinik GPS-imullu atortunik ilulissanut ikkussuileruttorpoq.
septembarip 13-at 2010 06:17

Knut Solbergip ikkussuinini kisimiilluni ingerlappaa. Angallamminit 12 meterisut takitigisumit ilulissat taliffigisarpai, ulimaallu ikuttaatigalugu ilulissanut qaqisarluni.

- Allunaasaq, sikumut ikuttaat atortullu allat atorlugit ilulissanut qaqisarpunga, taamalillungalu atortorissaarutinut ilitsivissaqqissumik ujaasisarlunga. Taamaalinerani ilulissat orfallannginnissaat neriuutigiinnartarpara, Knut Solberg CBC News-imut oqarpoq, nangillunilu:

- Annilaanganartaqaaq, iluliarsuimmi ulorianartuupput, taamaattumillu sivisunerusumik najorneqarsinnaanatik.

Knut Solbergip maannamut atortorissaarutit nassitsissutit iluliarsuarnut tallimanut ikkutereersimavai. Ikkussuunneqartut iluaqutigalugit iluliarsuit ingerlaarfii internetikkut malinnaavigineqarsinnaalersarput.

Norgemiup taassuma aappaagu aasakkut angalaqqinnissani pilersaarutigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq