Iluliarsuit 145-t kalittariaqarsimapput
Qeqertarsuup avataani, 175 kilometerisut ungasitsigisumi misiliilluni uuliamik qillerisoqarnerata nalaani, iluliarsuit 145-t kalillugit illuartinneqarsimapput.
Allattoq Apollo Jeremiassen
novembarip 19-at 2010 09:53
Uuliasioqatigiiffik Cairn Energy aviisimut Sermitsiamut taama paasissutissiipput.
Cairn Energyp misiliilluni qillerinerisa nalaani iluliarsuit kalillugit illuartinneqartut 145-t, assigaa ullormut iluliarsuit marluk kalillugit illuartinneqartarsimasut.
Paasinarsigaangat iluliarsuaq qilleriffiup tungaanut ingerlaartoq, umiarsuit sillimasuutitaasut ingerlutik ilulissat ornillugit illuartittarsimavaat, taamaaliortarput qilleriffimmi inuit atortullu ulorianartorsiortinneqarnissaat pinngitsoorniarlugu.
Wire-imik takisuumik pituutserluni iluliarsuit kalinneqartarput. Taamaaliortarput iluliarsuit qillerivimmiit 20 sømilitut ungasissuseqaleraagata. 20 sømilip assigaa 40 kilometeri, Sermitsiaq taama allappoq.
