Iluliarmiut qimmit qiluppalunnerinut naammagittartariaqarput

- Ilulissani inissiaqarfiit eqqaani qimmiliveqarneq unitsillugu illoqarfiup avataanut qimmilivinnik aaqqissuussaasumik pilersitsisoqartariaqarpoq. Taama isumaqarpoq Aakattak Sandgreen, qimmit qiluppalunnerinit unnuami eqqumaatitaasarnerminik qatsussisoq. Avannaata Kommunianiilli illoqarfimmi qimmiliviit attatiinnarniarneqarput.
Allattoq Kathrine Kruse
aggustip 30-at 2018 10:24

Ilulissani innuttaasut ilaat, Aakattak Sandgreen, isumaqarpoq oqallisigissallugu piffissanngortoq qimmit qimuttut, inissiaqarfiillu eqqaanni qimmivileqartinneqartut, inuit najugaqarfiisa ungataannut aaqqissuussaasumik qimmivileqartinneqalernissaat. 

Aakattak Sandgreenimi isumaqarpoq inissiaqarfiit ungataannut qimmit qimuttut qimmilivilersornissaannut inissaqarluartoq, taamaattumillu qimmivilinnik aaqqissuussanik siunissami pilersitsisoqartariaqalersoq.

- Soorlu unnuaq 6 tiimit qiluttoqarpoq. Sinippianngilagut. Uannut eqqaassangaanni sinippianngilanga unnuppassuit allat assigalugit. Taamaattumik aaqqissuulluakkamik, nakkutigisamillu, neriukkaluarpunga siunissami aamma pilersitsisoqarsinnaasoq, Aakattak Sandgreen oqarpoq.

Qimmiliviilli najugaqarfiit ungataannut inissinneqassappata, tamanna pilersaarusiorneqaqqaartussaavoq. Avannaatalu Kommunia maannamut qimmivilinnik allanngortitsinissamut pilersaaruteqanngilaq.

- Illoqarfiup iluani qimmiliviit ilaat sanaartornermut atatillugu nuunneqarsimapput. Kisianni teknikkimut ataatsimiisitaliamit aalajangerneqarnikuuvoq qimminik illoqarfiup avataanut nuusseqqittoqassanngitsoq. Qimmit illoqarfik ungalusimallugu inissisimapput, tamannalu ataatsimiisitaliap attatiinnarusuppaa, Hanne Holm Andersen, Avannaata Kommuniani illoqarfimmi pilersaarusiornermut pisortaq, oqarpoq.

Ilulissani qimmit qimuttut 1800-it nalunaarsorneqarsimasut Avannaata Kommunianit qimmiaqqat suli akiuussutissamik kapineqarsimanatik nalunaarsorneqarsimanngitsut 2000-it missaaniissasut tagginneqarpoq.