Iluliarmiut Avannaata Qimussersuanut piareerput

Avannaata Qimussersuanut anngunniuttut ilaat aallarnerlukkaluartut, tassami qimussit arfineq marluk aallarfimmi minutsit 20-it missaanni aallaraluartarlutillu sanngussaaqattaarmata, Ilulissaniit Avannaata Qimussersuaqarnissaanut ullumi tallimat imminnut unammilluavissorlutik anngupput.

Avannaata Qimussersuanut anngupput:

Jørgen Kristensen, ingerlaarsimalluni 1 tiimi, 33 minutsit aamma 24 sekundit, Kim Hansen, ingerlaarsimasoq 1 tiimi, 34 minutsit aamma 1 sekundit, Ville Siegstad, 1 tiimi, 35 minutsit aamma 23 sekundit, John Eliassen, 1 tiimi, 35 minutsit aamma 46 sekundit, kiisalu Niels Davidsen, ingerlaarsimasoq 1 tiimi, 36 minutsit aamma 27 sekundit.

Tassalu annguttut Sisimiuni Avannaata Qimussersuaqarnissaanut martsip 26-ani ingerlanneqartussamut unammeqataanissaminnut piareerput.

Avannaata Qimussersuanut anngunniunnermi qimussit 19-it peqataapput, ajoraluartumilli aallarnerliornerup kinguneranik marluk uniinnarput. Ukioq manna anngunniunnermut siullermeerluni peqataavoq 15-iinnarnik ukiulik Taitsiannguaq Ludvigsen, taanna nr. 16-ulluni tikippoq, piffissaq atorsimallugu 2 tiimit, 3 minutsit 40 sekundillu.

Qasigiarmiut aamma arfininngorneq marsip tallimaat sukkaniupput. Qasigiannguaniit Avannaata Qimussersuanut annguttut tassaapput: Jørgen Amossen, Hansiaraq Zeeb, Nukannguaq Samuelsen, Aqqalu Brandt aamma Lars Iversen.