Iluatsilluartumik atuakkiortoq saqqummersitseqqinnissamut piareertoq

Atuakkiortup Mads Peder Nordbop pinerluttulersaarusiaa, 'Pigen Uden Hud'-mik qulequtserneqarsimasup, Nunatsinni illoqarfiit pingaarnersaanni pisuusaartinneqartup tullissaata atuakkiarineqarnera piareerpoq.
Assi © : Mads Peder Nordbo
Allattoq Kenneth Elkjær
decembarip 28-at 2017 13:35

- Atuakkiami inuttaareersut atorlugit ingerlaqqissaagut, tassani Nuuk Kangerluarsoruserlu aallaaviussapput, Tunuli Pituffillu aamma tikinneqassapput. Kisianni soorunami aamma oqaluttualiap imai nutaat aamma sammissavagut.

Danskisut atuakkiamik nutaamik saqqummersitsinini ilutigalugu atuagaq ’Pigen Uden Hud’, oqaatsini assigiinngitsuni 18-ini ukiumi nutaami saqqummersinneqartussaq nittarsaallugu atuakkiortoq nunarsuarmut angalasussaavoq.

Tamannalu pissutigalugu Mads Peder Nordbo ukiuni kingullerni najugarisimasani, Nuuk nunarpullu qimallugu nuuttariaqarpoq.

- Kalaallit Nunaanniikkusunnerugaluarpunga suliannullu atatillugu Norgep Tysklandip Tuluillu Nunaata nalaanni najugaqarnissara tulluarneruvoq.

Mads Peder Nordbop atuakkiaa saqqummersussaq ’Kold Angst’-imik ateqarpoq Politikens Forlagilu aqqutigalugu 2018-imi marsip qaammataani saqqummersinneqarnissaa pilersaarutaavoq.