Iluatigut atisalerluni assilisittartoq aalassassimaarutaavoq

Arnat pinnerneqqusaallutik Tyrkiami unammilerpata arnap qallunaap, iluatigut atisalerluni assilisittartup, Kalaallit Nunaat sinnerlugu sassarniarnera, Nunatsinni aalassassimaarutavoq.
maajip 21-at 2010 10:58

Isumaginninermut siunnersortinngorniaq Ivalo Egede Martinsen, Odensemiittoq, akerliusunut quppernermik facebookimi pilersitsivoq.

- Siullermik kalaallinik nikanarsaanertut tigugaluarpara, kisianni ilimagaara eqqarsariaqqaarnani qallunaamik nassaarsimassasoq, Ivalo Egede Martinsen oqarpoq.

Facebookimi quppernermi ilaasortat ulloqeqqata siorna 328-nngoriikatapput.

Arnanik tamataarutigajallutik imminnut nittarsaattartunik ujaasisartoq Peter Hadward oqarpoq iminneqarami Danmarkimi kalaallinik ujarlersimagaluarluni.

- Kukkunera siunissamut ilinniutigaara, kisianni kukkunerujussuartut isiginngilara, tassami aaqqissuussinikkut Kalaallit Nunaat nunarsuup sinneranut nittarsaanneqarpoq. Peqataasup Danmarkimeersuunera ajunngitsutut isigaara, Danmark nunarsilu nunatut ataatsitut isigineqarsinnaammata, Peter Hadward oqarpoq.

Siumut inuusuttunut suleqatigiiffiat piaartumik akerliussutsimik takutitsinissamik aamma kaammattuivoq.

- Kalaallit uagut ajukkunnanngitsorpassuarnik peqarpugut, immikkuullarissuseqarnerpullu ataqqineqartariaqarpoq, Siumup inuusuttai ilaatigut tama allapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq