Iluarsartuussineq sippuiffiussaaq

Minngortuunnguup Atuarfiata iluarsartuunneqarneqarnissaanut atatillugu illussanik titartaasartunik unammisitsisoqarmalli paasinarsivoq, siunnersuutit arlaannaalluunniit qummut killiliussat 96 millioni koruunit ataallugit akeqarnavianngitsoq. Missingersuutimmi 15,5 millioni koruuninik sipporneqarput, tamanna kommunalbestyrelsep ataatsimiinnerata imaqarniliorneqarnerani atuarneqarsinnaavoq.

Atuarfiup atuarfitsialattut ingerlanissamut pisariaqartitai misissorluaatigalugit titartakkat misissoqqissaarneqarput, taamaalilluni sipporutissat 5,5 millioni koruuniinnanngortinneqarsinnaanngorlutik. Ikilisaanikkut init ataatsimoorfissatut suliassat angissusissaat affaannanngortinneqarpoq.

Kommunip sipaartariaqalernermigut atuareernerup kingorna paaqqinnittarfik eqaarsaartarfillu pinngitsoornatik sanasariaqartutut nalilerpai.

Aningaasat iluarsartuussinermut atorneqartussat ukiunut 2014/2015-imi karsimiittussanit aaneqarumaarput.

Minngortuunnguup atuarfia 450-t missaanniittunik atuartoqarpoq, taakkulu ilarpassui atuarfimmik iluarsaanneqarnerani Nalunnguarfiup atuarfiani atuarallarput. Naatsorsuutigineqarpoq iluarsartuussineq aggusti 2015-imi naammassissasoq.