Iluarsaasartut: Isumaqatigiissusioruminaappoq

Aquuteralalerisup pisisussallu allakkatigut isumaqatigiissuteqartarnissaannik Atuisartunut Siunnersuisoqatigiit kaammattuutaat aquuteralannik iluarsaassisartunit angujuminaatsinneqarpoq.

- Aquuteralaap ilua takutinnagu akimik taasisinnaanngilagut, aquuteralannik iluarsaassisartoq Saaleeraq Johansen oqarpoq.

- Motorip ilua suli takunagu akermik taasisinnaanngilagut. Assersuut, isumaqatigiissuteqarsinnaavugut ”sommerklargørinngit” (aasamut atornissaannut piareersaanerit, red.), uuliai taarsersorlugit, tamakku ajornanngillat. Kisianni motorit iluani qamani ajortoqartillugit, motori isatseqqaartinnagu, suliassat suuneri nalileruminaattarput, Saaleeraq Johansen, Ilulissat Marine Servicemi immikkoortortamik ingerlatsisoq oqarpoq.

Taamaammat siumoortumik allakkatigut isumaqatigiissusiorsinnaanerup ajornakusoornerarpaa.

Ilulissani biilinik tuniniaasartoq, 3H, aquuteralannik siorna tunisaqartalerpoq, tamatumalu kinguneranik aquuteralannik iluarsaassiffiusalerluni. Maannamut suli aquuteralannik iluarsaattarialannik suliaqarfiusimanngikkaluartoq, allakkatigut isumaqatigiissuisoreernissaq piginnittunit tapersersorneqaraluarluni aamma angujuminaassinnaasartoq oqaatigineqarpoq.

- Iluarsaassinissaq pillugu siumoortumik aalajangersaasoqarsinnaasanngilaq, tamanna aamma biilit motooriinik iluarsaassinermut tunngavoq. Kisiannni naliginnaasumik aserfallatsaaliinermut sulianut isumaqatigiissusiortoqakutsoorsinnaavoq, Ilulissani biilinik aquuteralannillu tunisisartut 3H-mi piginneqataasuat Tom Hjort Andersen oqarpoq.

Atuisartunut siunnersuisoqatigiit allakkatigut isumaqatigiissusiortarnissamik kaammattuuteqarput, tassa aquuteralaatillit isumaqatigiissummit akisunerusumik akiligassinneqartarlutik naammagittaalliuuteqartarmata. Kaammattuut tuniniaasartunit tigulluarneqarpoq paasilluarneqarlunilu.

- Kisianni aamma uunga imaaliortoqarsinnaasoq uanga taanna kaammattuut imatut paasivara, suliassaq una, una, una taakkua akit, ilaana nanineqarsinnaavoq, kisianni allanik suliassaqarpat, soorunami saniatigut allamik akiligassiisoqassaaq, Saaleeraq Johansen nassuiaavoq.

Aquuteralannik iluarsaassinermi aquuteralaat pisoqaassusaat kiisalu aserfallatsaalineqarnerinut tunngasut apeqqutaaqataasartut, aquuteralannik tuniniaasartut iluarsaassisartullu oqaatigaat.