'Iluaqutissaaqqullugu' Rosingip Kleistillu oqallisigissavaat
Nalunaarusiamik 'Kalaallit Nunaannut iluaqutissaaqqullugu'-mik saqqummiinerit marluk peqataaffigisimanngikkaanni unnugu periarfissaqarpoq. Nalunaarusiaq Minik Rosingip Kuupik Kleistillu Geologisk Museumimi unnugu oqallisigissavaat.
Nalunaarusiami 'Kalaallit Nunaannut iluaqutissaaqqullugu'-mi maannamit namminersulivinnissamut Kalaallit Nunaata ineriartortinneqarnissaanut periarfissat tallimat sammineqarput, naqissuserneqarporlu aatsitassat Kalaallit Nunaata siunissaminut toqqammaviginissaannut nungunneqarsinnaanngitsutut isigineqarsinnaanngitsut.
Nalunaarusiaq Nunatsinni annertuumik oqallisigineqareerpoq, tamannarpiarlumi siunertaasimsoq, Københavns Universitetimi Ilisimatusarfimmi ilisimatusartut ataatsimiititaliaanni nalunaarusiortuusuni siulittaasoq, professor Minik Rosing, nalunaarusiaq Københavns Universitetimi marlunngormat saqqummiunneqarmat taama oqarpoq.
Kuupik Kleistip Minik Rosingillu nalunaarusiamik oqallitsinneqarnissaat aallaavimmut uteqqinnertut taaneqarsinnaavoq, tassalu marluullutik aviisimi Politikenimi novembarimi 2012-imi allaaserisaannut. Allaaserisaminni tassani kaammattuutigaat ataatsimiititaliamik pilersitsisoqassasoq, kingornalu Kalaallit Nunaanni pinngortitameersut pisuussutit inuiaqatigiinnut iluaqutissanngorlugit atorluarneqarnissaannik siunertaqartumik ataatsimiititaliaq pilersinneqarpoq.
Aaqqissuussineq nal. 19.30 aallartissaaq, Bo Lidegaardilu aqutsisorineqassalluni.