Iluanaarniat killilerniarpai

Siunnersuutillu siunertaraa pisortat aningaasaleeqataaffigisaannik tassa 20 procentimik kommuunimit, 20 procentit Namminersorlutik Oqartussanit aningaasaliiffigineqaraanni, taava illutaartoqareerneratigut iluanaarniapiluttoqartannginnissaa.

Assersuutigalugu illuliortoqarpat pisortat namminersortullu taarsigassiissutaat 1 millionit koruunit atorlugit illup naammassereerneraniit ukioq ataaseq qaanngiuttorlu illu tunineqarpat 1,5 millionit koruunilerlugu. Taava tunisinermi iluanaarutip 500.000-it koruuniusut affaat pisortat aningaaseriviannut akiliutigineqassaaq. Tassa pisortanut 250.000-it koruunit akiliutigineqassasut.

Justus Hansen demokraatineersoq, siunnersuutini ima nassuiaateqarfigaa.

- Pingaaruteqarpoq, uuma suliap aallartinnissaa. Isumaqaramami pisoq ajornartorsiutaasoq annertooq. Siunnersuut una atorlugu ajornartorsiummut pinaveersaartitsiniarpugut, siunissamilu iluanaarniarnerit pinngitsoortinniarlugit, Justus Hansen oqarpoq.

Takornartaassimanngilaq pisortanit taperneqarluni illusinermi inissiamilluuniit pisinermi iluanaarniutigipilullugu tuniseqqittoqartarnera. Taamaammat Demokraatinit siunnersuutigineqarpoq illusinermi inissiasinermiluuniiit pisortanit tapiiffigineqartuni, pisinermit ukiut marluk iluani illu tunigaani, iluanaarutip 50 procentia pisortanut akiliutigineqartassasoq.

- Inissiamik illumilluuniit pisortanit inuit tapiiffigineqarlutik inissiarsigaangamik illusigaanngamilluuniit, iluanaarniutigipilullugu illumik tunisisarneri naluneqanngilaq, inuiaqatigiinnilu isertugaataaginnarluni.

Naalakkersuisut peqquneqarnissaanik Inatsisartut aalajangiiffigisassaattut siunnersuut Naalakkersuisut kingusinnerpaamik upernaammi 2012-imi peqquneqassasut siunnersuutigineqarpoq.

Siunnersuut marsip qulingani siullermeerlugu oqaluuserineqassaaq.