Iluanaarnianik ingiaanissaq kaammattuutigaa

Maniitsumi Alcoamik, Narsamilu kuannersuarni pilersaarutit piviusunngussappata, illut inillu akii qaffannissaat qularnanngilaq. Inatsiseqarnermi allannguisoqanngippat, innuttaasut landskarsiluunniit iluanaaruteqarnavianngillat, Birger Poppel, Ilimmarfimmi atorfilik taama naliliivoq.

Ullumikkut illunik inigisamilluunniit tunisinermi akileraarusiisoqarneq ajorpoq, taamaattumik pineqartuni inuit ataasiakkaat, illunik massakkut pisiortorunik, siunissami tunisinermikkut iluanaaruteqarujussuarsinnaapput.

- Illut akii qaffasissut, suliffeqarfissuarnut takkuttussanut suliniutilinnullu soqutaavallaarnavianngillat, Birger Poppel oqarpoq.

Illut akii qaffariassappata innuttaasunut tamanna ajornartorsiutaalissaaq.

Taamatullu iluanaarniartoqalertinnagu nalimmassaasoqalereersinnaavoq, eqqarsaatigissagaanni, qanoq iliornikkut akileraarusiineq inuiaqatigiinnut iluaqusiisinnaanersoq.

Akileraartarnermut atugarissaarnermullu ataatsimiititaliamit siunnersuutaasa ilagaat, inigisamik illumilluunniit tunisinermi iluanaarutit akileraaruserneqartalernissaat.

ineqarnermut akileraarusersuisalernissaq pingaartinneqarluni politikkikkut aaqqiivigineqartariaqartoq, Birger Poppel isumaqarpoq, inuiaqatigiit akornanni naligiinnerusumik inissisimalernissaq anguneqassappat.

- Aatsitassarsiortoqalissappat, Kalaallit Nunaanni naligiinnginnerujussuaq siuningerlugu iliuuseqassagaanni, taava akileraartarnikkut patajaatsumik aaqqissuisariaqarpugut. Taamaalilluta inuit ataasiakkaat, illunik pisiortorlutik, siunissami tunisinermikkut iluanaaruteqarujussuarsinnaanissaat pinngitsoortissavarput.

Taamaammat sioqqutsisumik iliuuseqartariaqarpugut, Birger Poppel oqarpoq.