Iluamik oqaloqatigiittoqarsimannginnera pissutaalluni ajunaartoqarpoq

Angutit marluk umiarsuarmi uuliamik assartuummi Orasilami inuttaasut, slangemik nunamukaassiniarlutik ukioq manna januaarip 16-ianni ipillutik ajunaartut pillugit nalunaarusiaq saqqummiunneqaqqammerpoq.
Allattoq Mads Lynge
maajip 29-at 2009 11:33

Inuttat marluk Saarlup eqqaani ajunaarput. Umiatsiaaraq atorlugu slangemik nunamukaassiniartillutik slangep sukattoornera pissutigalugu umiatsiaq kinnguvoq, Orasilamilu inuttat akornanni attaveqaqatigiinneq naammaginanngitsutut nalilerneqarluni.

Angut inuusuttoq 18-inik ukiulik, imarsiornermillu misilittaqarpallaanngitsoq, umiarsuarmillu aquttoq ajunaarput. Angutit taakku marluk unnulersoq ajunaarput, umiarsuullu naalagaa ajunaarnerup kinguneranik misigissutsimigut attortisimanera pissutaalluni uuliamik assartuut Orasila kingusinnerusukkut ikkarlittoq, nalunaarusiami aamma inerniliunneqarpoq.

Angutit ipillutik ajunaartut slangemik nunamukaassiniarnerup nalaani annanniutinik atugaqarsimanngillat.

Issittumi imaatigut angallannermik umiarsuarmi naalagaasut misilittagaqarpallaarsimangillat, umiatsiarlu slangemik nunamukaassinissamut atorneqartoq, issittumi atorneqarnissamut naleqqutinngitsoq aamma taakkartorneqarpoq.

Umiatsiaq slangemik nunamukaassinissamut atorneqartartoq orrajasuusimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq