Illuutiminnik annaasaqariaannaapput
Akileraartarnermummi Aqutsisoqarfiup akiliisitsiniartarfiata illut qulingiluat, katillugit 4,8 million koruuninik nalillit, akiitsunut qularnaveeqqusiummatigit:
- Qulingiluat qularnaveeqqusiunneqarput. Kisianni illumut piginneqataasimappat, piginneqatigiissutaata ilai arsaarinnissutigineqarsinnaapput tuniniarneqarnissaat angusinnaallutigu uani isumaqatigiissuteqanngippata, Ane-Kathrine Kleist, Akileraartarnermut Aqutsisoqarfiup avannaani immikkoortortaqarfiani siunnersorti oqarpoq.
Suliffeqarfinnut piginnittaannullu pisortanut akiitsulinnut, soorlu a-skattinut imaluunniit meeqqanut akilersuutinut, akiliisitsiniartartut suliassaminni 42-ni 35-it naammassivaat.
- Ulloq siulleq appaallu ulapaartorujuuvugut. Suliassat 35-it tulleriiaginnaavippagut. Ingerlalluarpoq aningaasat 900.000 koruunit angugajallugit ingerlaannaq akilerneqarput.
- Taakkua saniatigut akiittoqartup pisassaqarfiinut nalunaarutigisagut aningaasat uatsinnut ingerlatinneqartussat 1,7 million koruuniupput, Ane-Kathrine Kleist oqarpoq.
Akilisiitsiniartut 10,1 million koruuninit akiliisitsiniutigisaminnit 7,4 million koruunit isertikkamikkit iluarisimaarpaat:
- Akiitsullit sinneri imaassinnaapput nalilinnik annertuunik peqanngitsut, kisianni akilersuinissaminnut isumaqatigiissuteqarlutik. Kisianni ukua 7,4 million koruunit qularnaatsumik angugatsigit angusaq kusanaqaaq, Ane-Kathrine Kleist oqarpoq.