Illutsialassuit atorneqaratik napaannarput
Illut nunaqarfimmi atorfissaqartinneqaraluaqisut nunaqarfimmiut iserterfigisinnaanngilaat. Sooq iserterfigineqarsinnaannginnersut aamma akissutissarsisinnaanngilaat.
Lars Fleischerip Oqaatsuni nunaqarfimmi aqutsisunut qinigaanermi kingorna, nunaqarfimmi nutaanik illuliortoqarnissaa ilungersuutigisimagaluarpaa iluatsitsisimananili.
Hans Enoksenili Oqaatsunut tikeraarnermi ilaani neriorsuisimavoq illunik marlunnik sanasoqassasoq, tamannalumi piviusunngoraluarpoq.
Illulli ukiup aappassaa atorneqaratik inoqaratillu napaannarput – naak kommunip ukiumoortumik nakkutigigaluarai.
Lars Fleischerip illut pillugit paasiniaasarnermini akissutinnaarsiarisartakkani ima oqaatigaa:
- Akissutigisartagatuaat tassaavoq, suliaq ingerlavoq, tassa taannatuaavoq, Lars Fleisher oqarpoq.
Oqaatsut 45-it missaannik inoqarpoq, taamaattumik illut marluk nunaqarfimmiut atorfissaqartikkaluarpaat, ukiullu marluk matuma siorna illut naammassilermata piumaneqarsimaqaat. Suli naammassineqannginneri pillugit Lars Fleischer ima oqarpoq:
- Siullermik nukillalaarnarpoq, naggataata tungaani illarnaannarluniluunniit. Illut naammassereernikuugaluartut qanoq suleriarneri nalunaqigamik.