Illut sananeqaataat oqussutaasarput
Illuni oquup tusagassiutini sammineqarnerulerneratigut nunatsinni oquk takussaanerulersoq eqqarsalersitsisinnaavoq. Tamannali qularnaatsumik oqaatigineqarsinnaanngilaq, taama KNR-imut ilisimatitsivoq siunnersuisartoq oqunnik immikkut suliaqartartoq.
Sullivinnik nakkutilliisoqarfik KNRimut ilisimatitsivoq oquk pillugu kisitsitigut immikkut nalunaarsuisoqanngitsoq. Taamaattumik qularnaatsumik oqaatigineqarsinnaanngilaq oquk takussaanerulersimanersoq. Taamaattorli ilisimaneqarpoq oqummik peqquteqartumik iluarsartuussinerit annertuut maanna suliarineqartut.
Qanittumi KNRimi sammineqarpoq Uummannami atuarfiup ilaa 1.000 kvadratmeterisut annertutigisoq oqummat matuneqartoq meeqqat atuartut klassii tallimat illoqarfimmi illuni allani atuartinneqartariaqalersimasut. Qaqortumi atuarfik oqummit eqqorneqarnermi kingorna maanna aamma annertuumik iluarsaanneqarpoq assersuutissallu suli arlalissuugaluarput.
- Illuni oquk pilersinnaasarpoq illut sananeqaataat pissutaallluni, taama KNRimut oqarpoq siunnersuisarfimmik Iglotjekimik piginnittoq Casper Olsen.
Taassuma atortorissaarutit atorlugit illuni oquk uuttortartaarpaa nunatsinnilu suliffeqarfinni kisiartaavoq immikkut oquk pillugu ilisimasalittut ingerlasoq.
- Illup pitsaanngitsumik sananeqaateqarnera pissutigalugu silaannarissarfiit amigaataasinnaapput taamalu oquk siaruaatilertorsinnaasarluni. Aammali illut nungullariartornerat imaluunniit igalaat tulluutinngitsut pissutigalugit oquk pilersinnaasarpoq. Aamma erngup ajoqusigai ingerlaannaq iluarsineqanngippata oquk pilersinnaavoq, taama Casper Olsen oqarpoq.
Taassuma erseqqissarpaa illumik piginnittut akisussaaffeqartut silaannarissaasannginneq imaluunniit amigartumik eqqiaasarneq pissutaallutik oqummik pilersoqarsinnaasarmat.
- Oquttoqarneranik oqaluttuat amerligaluartut oqarsinnaanngilagut ajornartorsiut annertusisimasoq, taama Casper Olsen oqarpoq.
- Takorloorneqarsinnaalluarpoq nunani allani pisut assigalugit ingerlasoqartoq. Oquk ukiorpassuarni ilisimaneqarsimavoq oqallisaanerulerneratalu ajornartorsiut allisuusitippaa. Taamatummi aamma pisoqarnikuuvoq asbest oqallisaaleruttormat, taama Casper Olsen oqarpoq.
Oquk pinaveersimatinniarlugu nammineq iliuusaasinnaapput illup silaannarissarluartarnissaa taamalu isugutatsitsinaversaarluni. Eqqiaalluartarneq aamma aqqutaasinnaavoq oquup pinaveersimatinneranut.
Igalaat ussinnersut misissorluartaruk aammalu uffarfinni ussissaatit ilumut ussinnersut misissortaruk, ussiillisoqarsimatillugu isugutak pilerpat oquttoqarsinnaammat.
