Illusisut nuanniitsumik tupatsitaanissamut illersorneqalissapput
Isikkivigik. Inissisimanera pitsak. Illutaani naqqaniit qalia ilanngullugu aasimasoq. Pissutsinik taamaattunik illumi pisisut naammattuuinerlunnginnissaat Inatssiartuni amerlanerussuteqartut qulakkeerusuppaat.
Qanorli iliornikkut taamaaliortoqassava? Inissianik tunisinermut atatillugu illup qanoq issusianut nalunaarusiortoqartalissasoq, Demokratineersup Justus Hansenip siunnersuutigaa.
- Illup qanoq issua pillugu nalunaarusiamik takusassaqanngikkuit, taava pisisussatut tunngavissaluttorujussuussaatit. Naqqup qisuttaasa atai pitsaanersut oqorsaataaluunnit nakkaassimanersut takusinnaanngilat. Tassalu illup qanoq issusia pillugu nalunaarusiakkut tamanna isumannaarneqarsinnaavoq.
Siumumiit Kim Kielsenip siunnersuutiga, pisinermi isumaqatigiissut illua tungeriinnit atsiorneqartinagu, illu tuniniagaq sanaartornermik immikkut ilisimasalimmit misissorneqaqqaartassasoq:
- Taanna siunnersuut ataasiuvoq. Aamma inatsisilerituujusinnaavoq. Kisianni siunnersuutitsinni qitiuvoq, illu tunineqartussaq immikkut ilisimasalimmit misissorneqarsimassaaq. Taava immikkut ilisimasallip nalunaarusiaa pisisup tunisisullu tunngavilersuutitut atorsinnaavaat, Kim Kielsen nassuiaavoq.
Siunnersuut Inatsisartuni partiinit tamangajannit isumaqatigineqarpoq, Atassut kisimi pinnani. Kisianni inissianik pisinermi akinik aqutsinissaq amerlanerussuteqartunit peqataaffigiumaneqanngilaq. Akinik aqutsilernissaq Atassutip, Siumup Demokratillu illua tungilerpaat.
Justus Hansen saqqummiigami oqarpoq, Demokratit tassaasut "Nunatsinni kisimik politikikkut killilersuiniarnermik millisitsiniartuusut". Tassalu qallunaatut oqartarnerattut, kisimik liberaliullutik.
Kisianni Atassummit Knud Kristiansenip siunnersuut itigartikkamiuk, taamaaliorneq niuernermi pissutsinut akuliunnerunerarlugu, oqarpoq, Atassut Nunatsinni kisiartaalluni liberaaliusoq.
- Demokratit Inatsisartuni kisiartaallutik liberaliupput. Atassut liberaliunermik takutisinissamut periarfissaqarnikuuvoq, kisianni naalakkersuisuutitaqaraangamik pisortanit pigineqartunik suliffeqarfilioqataasarput. Sooruna namminersortut periarfissinngikkaat, Justus Hansen aperaaq.
