Illusisimaneq pillugu suliaq naammassinngitsoq
- Suliaq suli naammassinngilaq, tassa naalakkersuisut kammeraradvokatimut saaffiginnissuteqareersimapput suliaq pillugu misissueqqittoqarnissaanik piumasaqarlutik, taavalu sapaatip akunnerani 18-imi naatsorsuutigineqarpoq akissutit tigoreerneqarsimassasut. Isumaqatigiippugut ataatsimiititaliamik aqaguaguusaannannguaq katersuuteqqittussaagatta, akissuteqaatit tusariarlutigit nalilersueqqissaagut, Godmann Rasmussen oqarpoq.
Akissuteqaatit nalilersoreerunikkit ataatsimiititaliaq tusagassiuutinut nalunaaruteqaruteqarumaarpoq.
- Kammeradvokatip nalunaarusiaa aalajangiisussaaviusussaavoq. Naalakkersuisut apeqquteqaataannut immikkut akissuteqaatigisimasai aorpiaallu apeqquteqaatigineqarsimanersut nalilersoreerutsigit suliap naammassivilluni naammassinissaa ilimanartorujussuuvoq, nassuiaavoq.
Nangilluni oqaatigaa suliaq taama isikkoqartilluni oqallisineqartuarusaarnera ataatsimiititaliaminngaanniit qasunartutut isigineqalersoq.
- Inatsisartut peqqusimavaatigut taamatut misissuisitsineq ingerlatissagipput. Apeqqutigisimasagut ima pingaarsimatigipput allaat naalakkersuisut avammut saaffiginninnissaminnut pisariaqartitsilersimallutik. Tamanna tupinnanngilaq. Inuiaqatigiinnut taama kalluaaneq annertutigisoq kukkunani erseqqissumik paasinarluartumik paasisaqarnissaq inuiaqatigiinnut tamanut pingaartorujussuuvoq, Godmann Rasmussen oqarpoq.
Kukkunersiunermut ataatsimiitaliap taamaammat oqaatigisinnaanngilaa eqqartuussivitsigut malersuisoqassanersoq, kammeradvokatip naliliinera aallaviujumaarmat.
Inatsisartut kukkunersiuinermut ataatsimiititaliaata siulittaasua Godmann Rasmussen taama oqarpoq.
Inatsisartut upernaakkut ataatsimiinnertik nangissavaat sapaatip-akunnerata tulliani apriilip ulluisa 22-anni. Maajip ulluisa 15-ianni inatsisartut ataatsimiikkunnaassapput.
