Illusiatik akikinaarsimaqaat
Illusisut illut nalingat 8,7 milliuuni koruuninik minnaarlugu akiliisinneqarsimapput. Illunik tuniniaasartut illut tunineqartut 17 milliuuni koruuninik naleqarneraraluaraat 8,2 milluuni koruuniinnalerlugit tunineqarsimapput.
Kikkummitaavaaku taakkuninnga illunik aqqanilinnik pisisimasut?
Siulliullugit taaneqarsinnaapput illut nalingannit 1 milliuuni koruuninik akikinerusunngorlugit pisisimasut, tassalu Inuit Ataqatigit sinnerlugit naalakkersuisunut ilaasortaasimasoq, Johan Lund Olsen nulialu Lise Lennert Olsen, maanna Kultuurimut, Ilinniartitaanermut, Ilisimatusarnermut Ilageeqarnermullu naalakersuisoqarfimmi pisortaasoq. Taakkua illusiartik 1,3 milliuuni koruuninik akikinaarsimavaat.
Taavalu Aningaasaqarnermut naalakersuisoqarfimmi pisortaq, Peter Beck illusiaminik 1,2 milliuuni koruuninik akikinaarisimasoq.
Inunnik Isumaginninnermut immikkoortortaqarfimmi pisortaasimasoq, Finn Frederiksen aamma 1,2 milliuuni koruuninik akikinaarisimavoq.
Peqqinnissaqarnermut qullersaqarfimmi pisortaasimasup, Martha Abelsenip, aamma Ilaqutariinnut Peqqinnissamullu naalakersuisoqarfimmi pisortap, Martha Lund Olsenip tamarmik illusiatik 1 milliuuni koruuninik akikinaarsimavaat.
Ineqarnermut naalakkersuisuusimasup, Jørgen Wæver Johansenip illusiani 770.000 koruuninik akikinaarsimavaa.
Ineqarnermut qullersaqarfimmi pisortaasimasup, Olafur P. Nielsenip illusiani 588.000 koruuninik akikinaarsimavaa.
Nakorsiartarfimmi nakorsap Karl O. Karlsenip illusiani 367.000 koruuninik akikinaarsimavaa, Aalisarnermut Piniarnermullu naalakkersuisoqarfimmi allaffiup pisortaata, Niels Fensbop illusiani 311.000 koruuninik akikinaarsimagaa.
Kingullertut, Mikael Petersenip, naalakkersuisunut ilaasortaasimasup maannakkullu Siumumi allattaasup akikillisaaffiginikinnerpaagami illusiami nalinga 45.000 koruuninik ataallugu pisiarisimavaa.
