Illupalaami attartornermut akileerujuartariaqartartoq
Nunaqarfimmut Siorapalummut Juaanna Platou siorna ilinniartitsisunngorami, nunaqarfimmi ilinniartitsisup illuanut nutaanngitsmut ilaquttanilu iserterput.
2000-miit 2008-p tungaanut nunaqarfimmi ilinniartitsisuusimasumit, maanna toqukkut qimaguteersumit, Juaanna Platou oqaluttuunneqartarsimagaluarpoq illu taanna usseeqisoq. Ilinniartitsisuusimasoq oqaluttuartarsimavoq, ukiumi qiianarpallaaraagat allaat illumi iluani tupertarsimalluni.
Juaanna Platoup tamanna tusaramiuk isumaqarsimagaluarpoq ilinniartitsisuusimasoq ingasattajaarpaallaalaarluni oqaluttuarsimasoq, sunaaffa eqqortumik oqaluttuunneqarsimalluni. Tamannalu Juaannap ilaqutaasalu uppernarsivaat ilumoortoq:
- Ingammik avanneraagat qiiakulalersarpugut, aatsaallu atisanik oqortunik atisalerluta illup iluaniissinnaasarluta, Juaanna Platou oqarpoq.
Illup ussiippallaarnerata kingunera aningaasarpassuarnik atuisariaqalerneq.
- Illumut qaammammut 6000koruunit missaanni akiliisarpugut, taassuma saniatigut innaallagissamut 1000 koruuninik akiliisarluta. Ukiukkut qiianarlinerata nalaani uulia 15 literi ullormut atortarparput, tassa qaammammut 2.500 koruunit tassungaannaq atortarlugit.
Solari literimut akeqarpoq 5 koruunit 57 ørillu, tassalu ukiumi ullormut solaari 15 literi atoraanni qaammammut akiliutaasarluni 2.500 koruunit.
Illup ussiippallaarnera pillugu Juaanna Platou INI a/s-mut saaffiginnittaraluarpoq, iluamilli akineqassanani:
- Akillatuaraagamik paasiuminaatsunik akisarput, soorlu ilaanni allaffigineqarpugut, ruujorit kiassaammut atugassat Qaanaami piareeqqagaluartut aammalu taakkunannga sullissisussat akilerneqareeraluartut. Kisiannili tassa ulloq manna tikillugu kiassaatip ruujorii taarserneqanngillat.
Juaanna Platou ilaquttanilu INI-a/s-mit aamma kommunimit tusaajumaneqanngiinnaramik namminneerlutik illumik allamik mikinermilli pisipput taannalu aaqqissuullugu. Ilaqutariilli illu taanna tattoramikkut, ilinniartitsisup illua pisiariniarlugu qinnutigaat, namminneq oqorsarlugu inigisinnaalerniassagamikku. Kisiannili ulloq manna tikillugu ilaqutariit suli tusagaqanngillat.
