Illunut akiliutit pillugit Aleqa Hammondip Naalakkersuisut malersorpai

Aappaagu aningaasanut inatsisissami aningaasartuutissat tapiliussatut inissinneqarsimagaluarput, Atuagalliutilli inatsisartullu tupigusuppalullutik apersuilermata aappaagumut aningaasanik inatsisissamiit peerneqarpoq.

Naalakkersuisut siulittaasuat Kuupik Kleist ullumi ualilluinnaraa oqarpoq, akissarsiaqartitsineq pillugu inatsit malillugu inissianut akiliutaasartoq qaffaqqusaanngitsoq. Inatsillumi taannarpiaq Naalakkersuisoqatigiit aallartimmatali allannguuteqarfiginiarlugu sulissutigisimagaat oqarpoq, sulili maannamut allanngortinneqarsimanngitsoq. Taamaammat Naalakkersuisunut ilaasortat illumut akiliutisartagaat akueritinneqassasut oqarpoq.

Oqaaseqarnerlumi taannarpiaq pillugu Aleqa Hammondip § 36-i malillugu apeqquteqarsinnaanini atorluarpaa. Tassanimi apeqqutigaa qanga naalakkersuisut qanga taamatut aalajangersimanersut, sumilu aalajangiineq taanna allassimanersoq apeqqutigalugu. Maanna naalakkersuisut ullut qulit atorlugit akissutissaminnik piareersarnissartik periarfissarilerpaat.

Aleqa Hammond ima oqarpoq:

- Eqqumiigisara unaavoq aasarli suliarineqarsimappat inatsisitigut tunngavissaa Naalakkersuisunit suliarineqarsimanngila?

Taamaalilluni inissiat akitsulerneranik naalakkersuisut namminneq akiligassaqarnerulernissaanut pakkersimaarinninneq qassiiliuutaalerpoq. Tassami ineqarnermut akitsuilernermi naalakkersuisut suaaruteqarmata, ineqarnermut, attaveqarnermut angallannermullu naalakkersuisup Jens B. Frederiksenip oqaasii issuassagaanni una pingaartillugu oqaatigaa: "Inuiaqatigiinni nukittunerit oqimaannerpaanik nammataqartariaqarput".