Illumik inissiamilluunniit tunisinermi akitsuusersuinissamut siunnersuut Sulisitsisut Peqatigiiffiannit illuatungilerneqarpoq

Justus Hansen ullup qeqqanut radioaviisimut, ima oqarpoq:

- Inissiamik illumilluunniit pisortanit inuit tapiiffigineqarlutik inissiasigaangamik illusigaanngamilluuniit, iluanaarniutigipilullugu illumik tunisisarneri naluneqanngilaq, inuiaqatigiinnilu isertugaataaginnarluni.

Tamannalu allanngortittariaqartoq Justus Hansennip Demokraatineersup siunnersuutigaa.

Siunnersuutillu siunertaraa pisortat aningaasaleeqataaffigisaannik tassa 20 procentit kommunimit, 20 procentit Namminersorlutik Oqartussanit aningaasaliiffigineqaraanni, taava illutaartoqareerneratigut iluanaarniapiluttoqartannginnissaa. Assersuutigalugu illuliortoqarpat pisortat namminersortullu tarsigassiissutaat 1 millionit koruunit atorlugit. Illup naammassereerneraniit ukioq ataaseq qaanngiuttorlu illu tunineqarpat 1,5 millionit koruunilerlugu. Taava tunisinermi iluanaarutip 500.000-it koruuniusut affaasa, pisortat aningaaseriviannut akiliutigineqassaaq. Tassa pisortanut 250.000-it koruunit akiliutigineqassasut.

Naak iluanaarniapilulluni illunik inissianilluuniit tunisisarnerup pakkersimaartinneqarnissaat Kalaallit Nunaanni Sulisitsisut Peqatigiiffianit tassa GA-mit paasilluarneqarsinnaagaluartoq, tamanna GA-mit eqqarsarnartoqartinneqarpoq.

Sanaartugassanik suliassinneqartartut tassa entrepenørinik suliffiutillit, piffissani ajornerni sulinerminni periuseq atortarpaat illunik pisiarineqareersimanngikkaluanik illuliorneq. Tassani sulisunik soraarsitsinnginnissaq anguniarlugu periusigineqartarpoq, illuliarlu naammassigaanngat aatsaat inunnut tunineqartarluni.

GA-mi allattoqarfimmi pisortaq Karsten Klausen pisoq pillugu ima oqaaseqarpoq.

- Sanaartugassanik suliassinneqartartut periusertik, tassa illu suli pisiarineqarsimanngikkaluaq sanariarlugu aatsaat naammassippat tunillugu atorunnaassavaat. Tassami sanaartortitsisut illuliortitsinavianngillat, qularalugu illu akigisinnaannerlugu. Illu tunisartik aningaasatigut isertitsissutigisinnaanngikkunikku, illu suliarinavianngilaat. Taamaammat tassuunaatigut kingunerlutitsisinnaavoq, Karsten Klausen oqarpoq.

Karsten Klausenip ilanngullugu aamma oqaatigaa, inatsisissaq akuerineqassappat sineriammut eqquinerlussinnaasoq.

- Aningaasanik iluanaaruteqarluarnissaq pingaaruteqartarpoq, tassami taamaaliornikkut suliffeqarfiit aatsaat iluamik ingerlasinnaammata. Ullutsinnimi pisortat illuliortitsinissamut aningaasat atortagaat killeqaqimmata, Karsten Klausen, Sulisitsut Peqatigiiffianneersoq oqarpoq.