Illumi 20-t angullugit najugaqatigiittarput

Nalunaarusiaq nutaaq naleqquttumik atserneqarsimavoq "Nalaasaarfimmi sinilluni". Tassani takuneqarsinnaavoq nunaqarfinni, pingaartumik Nunavimmi Nunavummilu, illuni amerlanerni inuit amerlavallaat najugaqartartut. Nalunaarusiami paasinarsivoq illut ilaanni inuit 20-t tikillugit najugaqartartut.

Inuit pitsaasumik najugassaqannginnerat kisimi ajornartorsiutaanngilaq, inuilli taama amerlatigisut illumi ataatsimi najugaqartarmata ajornartorsiutit suli ajornerulersarput. Makivimmi præsidenti, Nunavimmilu naggueqatigiit Inuit pisortaanni ilisimaneqarnerpaaq, Piita Aatami, nalunaarusiaq pillugu tusagassiuutinut nalunaarummi oqarpoq, inissaaleqineq pissutigalugu isumaginninnikkut peqqinnikkullu ajornartorsiuterpassuit annertusisartut.

Peqqinneq pingaartumik eqqorneqartarpoq, tassami sakialluut tuberkulose Canadami naggueqatigiit Inuit akornanni, allanut naleqqiullugu, 15-eriaammik atugaaneruvoq, nunarsuaq tamakkerlugu atugaanerpaalluni.

Aamma naggueqatigiit Inuit akornanni meeraaqqat toqusarnerat annertoorujussuuvoq, allanut naleqqiullugu tallimariaammik annertunerulluni. Nunaqarfinni inissaaleqinerujussuup aamma malitsigisarpai imerajuttunngorneq ikiaroornartumillu atornerluineq. Piita Aatami aamma oqarpoq taama inissaaleqinerujussuaq illoqarfinni kujasinnerusuni akuerineqarnavianngilluinnartoq.

Nunavimmi Nunavummilu amerlanerusunik illuliortiternissaq anguniarneqarpoq, pitsaanerusumik inuuneqalernissaq taamaalilluni anguneqarniassammat.