Illuliornermi malittarisassat unioqqutinneqartut

Sisimiuni pisortat illuutaat imaluunniit tamat ornittagaat inatsit unioqqutillugu kaassuartaatinik atuisunut naleqquttunik isaariaqanngillat. Namminersorlutik oqartussani sulisut suliamik aalajangiisut inatsimmik unioqqutitsineq aaqqiivigeqquaat.
Allattoq Oline I. Olsen
oktobarip 28-at 2009 15:12

- Iseriartortut majorallaffii, ikaartarfiit kiisalu isaarissat sermertut pissutaallutik Sisimiuni kaassuartaatinik atuisut pitsorluttullu pisortat illuutaannut tamallu ornittagaannut, soorlu timersortarfimmut kiisalu pisiniarfiit ilaannut isersinnaasanngillat.

Poul Erik Christensen isaarissani amigaatigineqartut pillugit naammagittaalliuuteqareersorlu Ineqarnermut, Angallannermut Attaveqarnermullu Naalakkersuisoqarfimmi sulisut naammagittaalliuut eqqortuutippaat.

- Uteriittuuvunga, suliap suliarineqarnerani tunniutiinnanngilanga, tamannalu ullumikkut nuannaarutigaara, Poul Erik Christensen oqarpoq.

Sisimiuni ilinniartut ineqarfii 30-t, timersortarfik, TELE POST kiisalu Brugseneeraq inatsimmik unioqqutitsisumik isaariaat kaassuartaatinik atuisunut naleqqutinnginneri naammagittaalliuutigineqarput..

Illuliornermi malittarisassat 2006-imeersut piumasaqaatigaat najugaqarfiit tamarmik illullu allat januaarip aallaqqaataa 2007 aallanerfigalugu innarluutilinnut naleqquttumik sananeqartalissasut, tamannalu Sisimiuni malinneqanngitsoq Naalakkersuisoqarfimmit naqissuserneqarpoq.

- Malittarisassanut pikkorinnerpaasimanngilagut, Qeqqata Kommuniani teknikkikkut pisortaq, Laust Løgstrup oqarpoq.

- Massakkut illut pineqartut misissussallugit pilersaaruteqarpugut, Laust Løgstrup oqarpoq. Illut naammagittaalliuutigineqartut saniatigut illut allat pisortanit pigineqartut aamma misissuiffigineqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq