Illuliat iluarsaannissaannut taarsigassarsititsisarneq unitsinneqanngilaq

BSU-mik illuutillit illuutimik iluarsaannissaannut immikkullu aserfallatsaaliinissamut aningaasanik suli taarsigassarsisinnaapput, Ineqarnermut naalakkersuisoq Jens B. Frederiksen Per Berthelsenimut (S) akissuteqaammini taama oqarpoq.
februaarip 11-at 2010 04:33

- Aningaasanulli inatsimmi aningaasaliinissamut tunngavissani allassimavoq, aningaasaliissutit tulleriiaarneqarnerini illuni pioreersuni atortunik nalinginnaasunik pitsanngorsaanissamut taarsigassarsititsinissat salliutinneqassasut. Tassani pineqartut tassaasinnaapput qitiusumik kiassaateqarfimmut attaviliineq, ukioq kaajallallugu imermut attaviliineq, kuuffeqarfinnut attaviliineq, uffarfiliineq aamma oqorsaaqqinneq. Ineqarnermut naalakkersuisoq Jens B. Frederiksen taama ilisimatitsivoq.

Siumut sinnerlugu Inatsisartunut ilaasortaq, Per Berthelsen, paragraf 36 naapertorlugu ima apeqquteqarpoq:

- Suna inatsit pisinnaatitaaffillu tunngavigalugit BSU-mik illuutilinnut iluarsaanissamut immikkullu aserfallatsaaliinissamut taarsigassarsititsisarneq Naalakkersuisut unitsippaat?

- Ilisimatitsissutigisinnaavara BSU-mit taarsigassarsilluni illuliat imaluunniit nammineerluni illuliat iluarsaannissaannut aserfallatsaalinissaannullu taarsigassarsititsisarneq unitsinneqarsimanngimmat, Jens B. Frederiksen akivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq