Illuliassanik titartaasartut saqqummersitsinerat Unnuk kulturisiorfimmi ammarneqarpoq
Kultureqarnermut ministerip Marianne Jelvedip saqqummersitsineq 'Kalaalit Nunaat - nunarsuup qeqqanut ingerlaarimmik' taaguuserneqarsimasoq ammarpaa.
- Kalaallit Nunaat danskit kalaallillu akornanniinnaq oqallisaanngilaq. Nunarsaq tamakkerlugu oqallisigineqarpoq. Kalaallit Nunaammi nunarsuup ilagaa qitiusimillu inissisimalluni. Kalaallit Nunaat nunat ineriartorsimasut akornanni kisatullusooq inissisimavoq, kultureqarnermut ministeri saqqummersitsineq pillugu oqarpoq, Kalaallit Nunaatalu siunissami qanoq ineriartorsinnaaneranut arlalinnik siunnersuuteqarluni.
Kalaallit Nunaat pillugu saqqummersitsinerit soqutigineqarnerpaartaraat. Venedigimi aasaq saqqummersinneqarmat inunnit 148.000-init takuniarneqarpoq, Katuamilu saqqummersinneqarmat 7000-init takuniarneqarluni. Unnummi kulturisiorfimmi aamma soqutigineqartupilussuuvoq.
- Kalaallit Nunaat suunersoq inuppassuit naluaat, maannalu soorpiarneranik paasisaqarluarput. Kalaallit Nunaata inuppassuit isumaqarnerisut immikkuullarissuunnginnera takutissallugu Kalaallit Nunaanni paasissallugu pingaaruteqarsimavoq. Kalaallit Nunaat sumut immikkut ilisarnaataanngilaq. Sammisat Kalaallit Nunaannit saqqummiunneqartut aamma inunnut nunarsuarmit tamaneersunut 148.000-inut aamma pingaaruteqarput, taakkumi taamatorluinnaq aamma ajornartorsiuteqarput, saqqummersitsinermi aaqqissuisoq, nunap saneqaatai pillugi professori Minik Rosing oqarpoq.
Saqqummersitsinermik qanimut malinnaasimasut ilagaat borgmester Asii Chemnitz Narup, ammaanermi aamma oqalugiartoq. Inuit saqqummersitsineq aqqutigalugu Kalaallit Nunaat pillugu paasisaqarnerunissaat taassuma neriuutigaa.
-Kalaallit Nunaat Naalagaaffeqatigiinnut annertuupilussuarmik tunniussaqartarpoq, Kalaallit Nunaallu Danmarkip Issittumi suliniarneranut aallaaviuvoq. Tamannalu ukiuni makkunanerpiaq pingaaruteqartupilussuuvoq, oqarpoq.
Ammaanermi peqataasut ilarpassui Kalaallit Illuutaata unnuk kulturisiorfimmi aaqqissugaanut ingerlaqqipput, tassanilu savamik suppiliamik sassaalliisoqarpoq, kalattoortoqarluni, Mads Lumholt tusarnaartitsilluni Nuika Godtfredsenilu titartaalluni takutitsilluni. Unnuk kulturisiorfik Kalaallit Illuutaata kulturikkut aaqqissuussisarnerata anginerit ilagaat, nalunaqutarlu qulinut qiteqqummat pulaartut 800-t pallereersimavaat.
Peqatigisaanik aamma IA Siumullu Folketingimi tamanut ammasumik aaqqissuussisimapput. Johan Lund Olsen urani pillugu oqallitsitsivoq erinarsortartorlu Malu Rohmann tusarnaartitsilluni, Siumukkormiullu puisinniarneq pillugu sammisaqartitsipput Small Time Giantsikkullu tusarnaartitsillutik.
