Illukoq nassaarineqartoq Jesusimut attuumassuteqanngitsoq
Oqaluttuarisaanermi siullersaamik Jesusip Nazarethimi alliartornerata nalaani illugineqarsimasoq itsarnisarsiuut nassaarisimavaat. Illukorli nassaarineqarsimasoq itsarnisarsiuut Jesusimut attuumassuteqassangatinngilaat.
decembarip 21-at 2009 17:07
Kristumiorpassuimmi isumaqarput, taamani niviarsiaq Maaria, Jesusilu qaarusummi najugaqarsimasut, inigisimagunagaallumi Nazarethimiittoq oqaluffik Bebudelseskirkemik taaneqartartup naqqaniinnerartarpaat.
Itsarnisarsiooq Yardenna Alexandrep oqaluffiup eqqaani assaanerni aqutsisuusoq oqarpoq, illut iigaat taamanernisat nassaarisimatik marlunnik initaqartuusut kaajaluisaqartorlu.
"Nassaarisarput pingaaruteqarluinnartuuvoq, tassami juutit nunaqarfeeraani Nazarethimi siullerpaamik illumik nassaarpugut, illulu taanna illut taamanikkut naliginnarmik inigineqartartut assigissagaat naatsersuutigaarput", Alexandre oqarpoq.
Alexandrellu ilimagaa, Nazareth, maannakkut 65.000-inik innuttalik Jesusip nalaani nunaqarfeeraasimassasoq.
