Illuinnarmik pilersuisullit atugarissaarnerulissanngillat
Naak suut tamarmik ukiuni kingullerni aqqaneq-marlunni akitsoraluttuinnarsimagaluartut, meeqqanut illuinnarmik pilersuisulinnut akilersuutit ukiuni taakkunani qaffatsinneqarsimanngillat. Taamaammat Demokraatineersoq Esmar Bergstrøm inatsisartut ullumi ataatsimiinneranni siunnersuuteqarpoq, meeqqanut akilersuutaasartoq qaffanneqassasoq, tassa ukiup affaanut 4.548 kr.-niit 5.394 kr.-nut akilersuutit qaffatsillugit.
Meeqqat ataasiinnarmik pilersuisullit, pilersuinermi angajoqqaap aappaata tapersiutitut ukiup affaanut akiliutigisartagaa, ukiuni aqqaneq-marlunni qaffanneqarsimanngikkaluartoq, inatsisartuni amerlanerussuteqaqisut meeqqanut akilersuutaasartut aammaarlutik qaffatsikkusunngilaat. Qaffaanissamik siunnersuut, Atassummiit, Siumumiit, IA-mit Kattusseqatigiinniillu itigartinneqarpoq.
Meeqqanut ataasiinnarmik pilersuisulinnut akiliutaasartunut qaffaanissamik itigartitsineq meeqqamut eqquinerluinerusoq, siunnersuuteqartoq Demokraatineersoq Esmar Bergstrøm, isumaqarpoq.
- Meeqqat atisaasa akii qaffannikuupput, ineqarneq, nerisaqarneq, allatigullu atuisarnermi akit aamma qaffannikuullutik. Oqartoqartaraluarpoq akileraarutitigut oqilisaassisoqarsimasoq, kisianni tamanna naammanngilaq, Esmar Bergstrøm Demokraatineersoq oqarpoq, nangillunilu: - Kisimiillutik pilersuisut aningaasanut tunngatillugu naallioqaat, taamaammat uagut isumaqarpugut, tapiutitut meeqqanut akilersuutit qaffanneqarnissaat naapertuutissasoq, ullumikkummi akiuliutaasartut ullutsinnut naleqqukkunnaarsimapput. Aamma 1994-mili meeqqanut akiliutaasartut kingullermik qaffanneqarput, taamaammat pissusissamisoorsorigaluarparput, meeqqanut akilersuutit ukiup affaanut 846 koruuninik qaffannissaat.
Esmar Bergstrøm Demokraatineersoq taama oqarpoq. Demokraatit aamma isumaqarput, Nunatsinni meeqqanut akilersuutaasartut nunanut allanut sanilliullugit appasinneruallaartut, Demokraatillu isumaat naapertorlugu, 1995-miilli ukiut tamaasa meeqqanut akilersuutit agguaqatigiisillugu ukiumut 141 koruuninik qaffattarsimasussaagaluarput.
