Qujaukitsoq: Illuinnaasiorpallaaqaaq danskillu soqutigisaat kisiisa aallaavigineqarlutik

Nalunaarusiaq nutaaq "Grønlandskortet", kalaallisuunngoraanni "danskit amerikamiunut isumaqatigiinninniarnerminni iluaqutaat", nunanut allanut tunngasunut naalakkersuisoq taama naliliivoq.
Allattoq Ivik Kristiansen
marsip 15-at 2017 07:36

- Nalunaarusiaq illuinnaasiortorujussuarmik danskit soqutigisaat aallaavigalugit kisimi aallaaveqarluni qulaajaanerusoq isumaqarpunga, Vittus Qujaukitsoq taama oqarpoq.

Naalagaaffeqartigiit Amerikamiunut attaveqarnerminni nunatsinnik iluaquteqarsimasut, nalunaarusiap nutaap inerniliuppaa.

Sammisarli oqallisiginaveersaagaavoq, danskillu kalaallinik ajuallatsitsinissartik annilaanngatigimmassuk, ammasumik oqallisigineq ajorpaat. Nipangersimaarnerli isertuussaqarnermik Nunatsinnit takussutissaasorineqartarmat, tatigeqatigiinnginneq annerulerpoq.

Tamannalu ajornartorsiutaavoq. Nunatta USA-mut pingaassusia sorsunnerup nillertup kingorna apparsimavoq, Amerikamiullu Nunatsinniinerat naalagaaffeqatigiit iluaqutiginerussappassuk, taava naalagaaffeqatigiit suleqatigiilluarnerusariaqartut, naluanaarusiami inerniliunneqarpoq.

Nalunaarusiarli kukkusumik saqqummersitsisoq, Vittus Qujaukitsoq tassa isumaqarpoq.

 - Isumaqarpunga uani pingasoqiusamik Nunatta USA-mut attaveqarnera Danmarkip kimikillisarujussuaraa,

Amerikamiut Nunatsinniinneratigut aningaasarsiornerusinnaanerput suliffissaqarnerusinnaanerpullu Danmarkip nalikinnerulersinniaraa, Vittus Qujaukitsoq aamma isumaqarpoq.

Nalunaarusiarli politikerinik atorfilittanillu Nunatsinneersunik, Danmarkimeersunik Amerikamiuneersunillu apersuinernik aallaaveqartoq, nalunaarusioqataasup, Jon Rahbek- Clemmensenip, erseqqissaatigaa.

Danskit amerikamiullu apersuneqartut Nunatta USA-mut pingaassusaanik naliliinerat, Nunatsinni apersorneqartut naliliinerannut naleqqiullugu appasinerusartoq, nalunaarusioqataasup oqaatigaa.

 - Taamaammat danskit amerikamiullu politikerii atorfilittaallu Kalaallit Nunaannut isertuussaqarniarlutik anngiortumik pilersaaruteqarsorinngilakka, Syddansk Universitetimi adjunkti nalunaarusioqataasorlu Jon Rahbek- Clemmensen oqarpoq.