Qilalugaq illugiilik junip ulluisa 20-anni Canadap avannarpasissuani aamma pisarineqarsimavoq, taama oqaluttuarpoq News North.
Upernaaq manna Upernaviup eqqaani Kangersuatsiami Piniartoq aamma illugiilimmik pisaqarpoq, taamaattumillu pisaqartarneq qaqutigoortuusoq oqaatigineqartarpoq.
Canada-p avannaarsuani Grisefiord-imi (Ausuittuq-mi) piniartut marluk, Tommy Kalluq aamma Marty Kuluguqtuq, illugiilimmik pisaqarsimanertik tupaallaatigalugulu nuannaarutigeqaat.
- Pisareerlugu qaqinnialerakkut, mattattorluarnissara eqqarsaatigeruttorlugu, takulikkakka upperinngeqqaaraluarpakka. Isumaqaraluarpungami qilalukkap tuugaava immap iluani tarrarsortoq, sunaaffami illugiilik, Tommy Kalluq oqaluttuarpoq.
Piniartut illugiilimmik qilalugarsimasut tuugaaq tuniniassallugu ulapputeqannginnerarput.
- Akilillluarusuttumik neqeroortoqarnissaa utaqqissavara, Tommy Kalluq oqarpoq.