Illua’tungiliuttut pakatsipput

- Nalinginnaasumik siunertaasariaqaraluarpoq, inatsisartut tamakkerlutik aningaasanik inatsisissamik sunniuteqaqataallutillu akuerseqataanissaat siunertaralugu Naalakkersuisut sulissasut, Kuupik Kleist oqarpoq.

Aningaasanut inatsisissatut siunersuummut tunngatillugu maluginiarpaa, amigartoorutissatut missingiunneqartut massakkut milliardit affaat pallisimalersimammatigik.

- Ukiut siuliini siunniunneqartunit annertunerujussuupput pasitsannarporlu nunatta karsia aqunneqarsinnaajunnaapajaarluni ingerlalersimasoq, Inuit Ataqatigiit siulittaasuat oqarpoq.

Demokraatit Inuit Ataqatigiittulli tupigusuutigaat, aningaasanut inatsisissaq pillugu isumaqatigiinniarnissanut atatillugu Inatsisartuni partiit tamarmik peqatiserineqanngimmata.

- Aningaasat amigartoorutaasussat ineriartortitsinermuinnaq atorneqartussaanngillat, aamma ulluinnarni ingerlatsinermut atorneqartussaapput, Jens B. Frederiksen tikkuaavoq.

Taanna oqarpoq, Alcoa-mut tunngatillugu aningaasat atorneqartussat uteqqinnissaat qulakkeerneqanngitsoq.

- Aatsitsivik pilersinneqassanngippat piginneqataassanngikkuttalluunniit, taava aningaasartuutit qanoq ililluta utertissavagut, aperaaq?

Demokraatit siulittaasuata annilaanngatigaa, Nunatta Karsiata amigartoorutigiumaagai innuttaasunut tutsinneqassasut.