Illuatungiliuttutut pissusilersornerat qatsuppaa

marsip 09-at 2006 15:25

Kalaallit Nunaata Ammerivianut tunngatillugu, Atassutip partiianeersoq Augusta Salling, kingumut Naalakkersuisunut piumasaqarpoq, Ammeriviup pisortaa suliunnaarsikkallarneqarluni suliffeqarfimmi misissuilluartoqassasoq. Atassutip taamatut pissusilersortuarnera, illuatungiliunnertut pissusilersornerusoq, Naalakkersuisut siulittaasuata Hans Enoksen-ip nalilerpaa.

- Ilungersunarpoq naalakkersuisooqatigiilluni illuatungiliuttutut pissusilersornerat, uffalu ilisimareerlugu allakkat ingerlanneqareersut. Taamaaliornerat ingerlaannassappat sakkortuumik oqarfigineqartariaqassapput. Naalakkersuisooqatigiit iluanni taamatut pissusilersornerat nuanninngilaq.

Taama oqarpoq Hans Enoksen.

Jakob Abelsen-ip Naalakkersuisunut ammasumik allagai aallaavigalugit, Ammerivimmi sukumiisumik misissuisoqartariaqarneranik Atassutip piumasaqarnerata aallaavigaa, Ammerivimmi aningaasaqarnermut pisortaasimasoq Jakob Abelsen, paasissutissanik nutaanik saqqummiussinera.

- Jakob Abelsen-i Ammerivimmi aningaasaqarnermut pisortaanikuuvoq, taamatullu saqqummiussaqarnera isiginngitsuusaaginnaarneqarsinnaanngilaq, uppernassusialu takusinnaallutigu. Taamaammat sukumiisumik misissuisoqarnissaa pisariaqarsoraarput, aamma naalakkersuisut ataatsimeeqatigeeriarlutik sukumiisumik misissuisoqarnissaa aalajangissagaat naatsorsuutigaarput. Taamatut pisoqanngippat, misissuinissami aqqutissanik nutaanik ujaaseqqittariaqassuugut.

Taama oqarpoq Augusta Salling. Atassutip piumasaqarneranut atatillugu Naalakkersuisut immikkut pilersaaruteqanngitsut, Naalakkersuisut siulittaasuat Hans Enoksen oqarpoq.

- siulersuisunut allakkat ingerlanneqareerput, taakkualu qanoq oqaaseqassanersut apeqqutaavoq.

Taama oqarpoq Naalakkersuisut siulittaasuat Hans Enoksen.

Ammeriviup pisortaa Michael Nielsen tunuarallartinneqarnissaanut Atassutip piumasaqarnera, Ammeriviup siuliersuisuisa kisimiillutik aalajangersinnaagaat Hans Enoksen erseqqissaavoq.