Illuatungiliuttut suli erseqqissaaffigineqarusupput

Atassut Demokraatillu Royal Greenlandi pillugu naalakkersuisut inatsisartunut nassuiaasariaqarnerat inatsisartut siulittaasoqarfiannut ippassaq saaffiginnissutigaat.

Demokraatit siulittaasuata Per Berthelsenip naak pisoq pillugu assigiinngitsutigut nassuiaasoqartareeraluaq tusagassiuutillu sammingaatsiareeraluaraat suli erseqqinnerussumik nassuiaasoqannginnerarpaa.

Inatsisartut ataatsimiinnerata nalaani oqaluuserisanngortitsisoqarnissaanik periarfissaqarmat saaffiginnissimanerarput, Per Berthelsennilu malillugu inatsisartuni amerlanerussuteqartut kissaatigaat Royal Greenland pillugu naalakkersuisut nassuiaasariaqartut:

- Takusinnaagatsigu qinnuteqarnermi amerlanerussuteqarneq pilersinneqartoq. Inuit Ataqatigiinnit Aqqaluk Lynge aamma nassuiateqartoqarnissaanik kissaateqarmat. Takusinnaalerparput asuli oqaluttoqanngippat Demokraatit Atassutikkut taavalu IA-kut, qularnanngilluinnartumillu aamma Kattusseqatigiit nassuiaateqartoqarnissaanik piumasaqarput, taamaammat oqaluuserisassanngortitaqarpugut. 

Aqqaluk lyngilumi eqqortumik nassuiaasoqarnissaa arfininngormat kingullermik piumasarigamiuk ima oqarpoq:

- Avammut oqaluuserineqaannarsinnaangitsutut isikkoqarpoq, asuli pasillernerit piinnassanngippata ammasumik erseqqissumillu nassuiaasoqartariaqarpoq.

Atassut Demokraatillu saffgiginnissutiminni apeqquterpassuit allattorsimavaat, qularnanngitsumillu apeqqutit amerlanerit akinerareeraluartut eqqortoq tusarumavaat:

- Eqqortoq tusarumavarput, taannalu saqqummiunneqareerpat kingunissaa nalilersorneqaqqissaassaaq. Eqqartugarput sukkuaqqanik tuniniaaviunngilaq, tassaavoq suliffeqarfissuaq inuiaqatigiinnut pingaaruteqarnerpaasoq, suliffeqarfittut qaammalu aningaasanik kaaviaartitsivittut, taamaattumik avataaninngaanniit tatigineqarluinnarnissaa aamma uagut suleqataaffigisariaqarparput.

Demokraatineersoq Per Berthelsen ualiartoq taama oqarpoq. Inatsisartut siulittaasoqarfiata Atassutip Demokraatillu saaffiginnissutaat ataasinngorpat aalajangiiffigissavaa. Naalakkersuisut siulittaasuat Hans Enoksen saqqummiussaareersut saniatigut allanik nassuiaatissaqannginnerarpoq.