Illuatungiliuttut qinersinissaq oqiliallaatigigaat

Naalakkersuisut siulittaasuata Hans Enoksenip, Inatsisartunut novemberip 22-ianni qinersisoqarnissaanik ippassaq unnukkut nalunaarutaa, illuatungiuttut iluarisimaarpaat.

- Tassa taama pisoqartariaqarpoq. Taamaallaat uggoraara Hans Enoksenip taama sivisutigisumik utaqqisimmatigut, Per Berthelsen Demokraatit siulittaasuat taama oqarpoq. Uparuarpaa, aningaasanut aappaagumut inatsisissamut isumaqatigiinniarnerup sivisuumik ingerlanneqarsimanera, isumaqatiittoqarsinnaanngimmallu qinersinissaq pissusissamisoortuusoq.

Aningaasanut inatsisissap imartuup naammassineqarluni isumaqatigiissutigineqarnissaanik isuma, Inatsisartut ukiaanerani ataatsimiinnissaat sioqqullugu pissammat, Demokraatinit assut nersualaarneqaraluarpoq, Aningaasaqarnermullu naalakkersuisoq Josef Motzfeldt isumaqatigiinniarnernik Per Berthelsenip aqutsilluarsimanerarpaa.

Isumaqatigiinniarnerit unittoornerannut partii Siumut kisiat pisuunerarpaa, qalleqqissarlugulu, aalisarnermut nalunaarusiaq pillugu Radioaviisip qulaajaanera pissutigalugu Hans Enoksen qinersinissamik nalunaaruteqartoq.

- Qinersisoqarnissaali aalajangiunneqarpoq, qilanaalereerpungalu, Per Berhelsen oqarpoq.

Demokraatit qineqqusaarnissamut piareersimapput, mappersakkat qineqqusaarnissamullu pilersaarutit naqinneqareerput, takoqqusaarutissat inniminnerneqareerput qineqqusaartussallu tamarmik qilanaaqaat.

Demokraatit qineqqusaarutissaannut pingaarnernut ilaapput inissiat pitsaanerusut akikinnerusullu, ilinniartitaanerup pitsanngorsarneqarnissaa aamma demokratii pillugu aningaasaateqarfiliornissaq.

Atassummi nuna tamakkerlugu siulittaasoq Finn Karlsen oqarpoq, qinersisoqartussanngornera tusaramiuk assut nuannaarutigisimallugu.

- Inuiaqatigiit qulaaninngaanniit naalakkersorneqarnerat maannamut ingerlanneqartoq akuerineqarsinnaanngilaq. Soorlu assigiimmik akeqartitsineq atorunnaarsinneqarpoq, tamannalu akuersaaruminaatsorujussuuvoq, taamaattumik qinersisitsisoqartussanngornera pissusissamisoorluinnarpoq , Atassutip siulittaasua Finn Karlsen oqarpoq.

Kattusseqatigiit siulittaasuat, Anthon Frederiksen, aamma oqarpoq, qinersisoqarnissaanik aalajangertoqarnera oqiliallaatigigini.

- Tamanna inuiaqatigiinnut toqqissisimanarnerpaassaaq, qinersinissarli Naalakkersuisut siulittaasuata siusinnerusukkut nalunaarutigisimasinnaagaluarpaa, Anthon Frederiksen oqarpoq.