Illuatungiliuttut: Qaqortumi mittarfiliortoqartariaqarpoq
Demokraatit siulittaasuata Jens Frederik Nielsenip Qaqortumi mittarfiliarineqartussap illorsuartassaatalu suliariumannittussarsuunneqarneranni neqerooruteqartut piumasaat naatsorsuutigineqartumiit akisunerunerat ajuusaarutigaa.
- Siullermik soorunami uggornarpoq akit naatsorsuutigisamiit taamak nikingatigisut, kisianni takorlooreersimavarput siullermik neqeroortitsisoqarmat akit taamaammata, Jens Frederik Nielsen oqarpoq.
AAMMA ATUARUK Naalakkersuisoq neriorsuisoq: Qaqortoq mittarfittaassaaq
Taamaammat Demokraatit Naalakkersuisoqataaneranili piareersarluartoqarnerusinnaasimagaluartoq nassuerutigaa.
- Soorunami tamanikkulli piareesarneqarsimasussaavoq tamanna, Demokraatit siulittaasuat, Jens Frederik Nielsen, oqarpoq.
Qaqortumi mittarfissaq Kim Kielsenip (S) Naalakkersuisunut siulittaasuunerani suliariumannittussarsiuunneqaqqaarpoq, akigitinniakkallu naatsorsuutigineqartumit qaffasinnerunerat taamanikkulli ilisimasimanerarpaa.
Kim Kielsen Inatsisartut sanaartornermut ataatsimiitsitaliaanni Siumup massakkut ilaasortaatitaraa.
- Tassa soorunami akia qaffakkiartorsimavoq tamatta tamanna nalunngilarput, Kim Kielsen oqarpoq.
AAMMA ATUARUK Tusagassiuut: Qaqortumi mittarfissaq ilimagisamit naannerussaaq
Qaqortumili 1.500 meterisut takitigisumik mittarfiliornissaq Inatsisartut aalajangiutereersimammassuk mittarfiup naannerunissaa Kim Kielsenip akuerisinnaanginnerarpaa.
- Takissuaannut tunngatillugu Inatsisartut oqaluuserereersimavaat, Inatsisartullu tassa taamanikkut aaliangereernikuupput 1499 meteriussasoq, Kim Kielsen oqarpoq.
Demokraatit siulittaasuat isumaqataavoq.
- Mittarfittaartoqarpat kujataani inuussutissarsiutinut annertuumjik pieriarfissanik ammaasisussaavoq, tamaammat akia maannakkut uggornaraluartumik qaffasippallaaraluartoq Demokraatiniit aningaasanik nassarniaqataanissatsinnut piareersimavugut, Jens Frederik Nielsen oqarpoq.
AAMMA ATUARUK Ilisimatuut: Mittarfissuassat atulerpata Kalaallit Nunaata aningaasaqarneranut iluaqutaassapput
Taamaammat Qaqortumi mittarfissap akisugaluaqisup siunissamut aningaasaliisutissatut isigalugu piviusunngortinneqarnissaa illuatungiliuttuneersut Naalakkersuisunut kajumissaarutigaat.
- Nunatta kujataa nunap immikkortua angallannikkut aaqqissuusiffigineqarnissaa pisariaqavissortoq Demokraatiniit isumaqarpugut, taamammat akia suli pisortatigoortumik Naalakkersuisuniit saqqummiussiffigineqanngikkaluarluta tusagaqanngikkaluarluta attapparput mittarfittaartariaqartoq Qaqortoq, Jens Frederik Nielsen oqarpoq.
Qaqortumili mittarfiliarineqartussamut tunngatillugu aningaasat amigataasut sumit aaneqassanersut Naalakkersusiunut illuatungiliuttut massakkoqqissaaq oqaatigisinnaanginnerarpaat.
