Illuatungiliuttut pisortaata Inuit Canadami paasilluarpai
Canadami naalakkersuisunut illuatungiliuttut siulittaasuat Michael Ignatieff aasaq manna nunami tamarmi angalaarpoq ilaatigut naalakkersuisut konservativiusut isornartorsiortarlugit ilaatigullu qinersinissamut tullermut taasinernik katersiniarluni.
Nunavummi illoqarfiit pingaarnersaannut Iqalunnut pingasunngormat tikippoq tassanilu Nunavummi naalakkersuisut siulitaasuannik Eva Aariammik ataatsimeeqateqarluni.
Ataatsimiinnerup kingorna Iqalunni tusagassiortunik katersortitsinermi oqarpoq Canadami naalakkersuisut oqarluartaarutinik ulikkaartut iliuuseqartarnerilu amigaataasut. Maani Nunavummi inuiaqatigiinni attaveqaatit amigaataapput, illut amigaataapput, namminersorneq pillugu isumaqatigiinniarneq amigaataavoq umiarsulivissarlu neriorsuutigineqaraluartoq suli amigaataalluni, taanna taama oqarpoq.
Ministeriunerli naalakkersuisullu tamanit annermik isornartorsiorpai Baffinip Kangerliumarngani Lancasterillu Ikerasaani sajuppillatsitsisarluni misissuinissat, eqqartuussivimmit unitsinneqaqqammersut pillugit naggueqatigiit inuit naammattumik apersorneqarsimanngimmata. Ignatieff nangilluni oqarpoq Eva Aariak oqaluutereerlugulu maanna paasisinnaalerini naggueqatigiit inuit ineriartortitsinissamut akerliunngitsut, taamaattorli torersumik isumatuumillu periaaseqarluni apersorneqarnissartik piumasarigaat.
Ministeriuneq ullormi tassani aviisimut Globe and Mailimut oqarpoq sajuppillatsitsisarluni misissuinerit Nunavummi eqqartuussivimmit unitsinneqarnerat paasisinnaanngikkini.
