Illuatungiliuttut: Oqalugiaat nutaarsiassaqaranilu amigaateqarpoq

Inatsisartut ataatsimiinnerat ullumi ammarlugu Naalakkersuisut siulittaasuata oqalugiaataa, Inatsisartut ataatsimiinnerinut allanut ammaalluni oqalugiartarnerinut naleqqiulluni allaassuteqangaaranilu nutaarsiassartaqanngilaq, amigaateqarlunilu. Taama Inatsisartuni partiit illuatungiliuttut Demokraatit Kattusseqatigiit Partiaallu naliliipput. Naalakkersuisut siulittaasuat Hans Enoksen ullumi oqalugiarami ilaatigut ima oqarpoq:

- Tamakkuli tamarmik aningaasalersorneqassappata inuiaqatigiinni naleqqussaanissat avaqqunneqarsinnaajunnaarput.Tamatta peqataasariaqarpugut allanik akiliunneqarnissarput kisiat tuppallersaatigiinnarsinnaajunnaarparput.Tamatta peqataassaagut akeqassaaq, inuiaat nammineerusuttut pilersinneqasappata aamma tamatta ataasiakkaarluta akileeqataanissarput kalluarneqarnissarpullu saneqqunneqarsinnaanngilaq.

Hans Enoksenip ammaalluni oqalugiaataanut

siullermik Demokraatit siulittaasuat inatsisartunilu ilaasortaq Per Berthelsen ima naliliivoq:

- Kikkulluunniit isorinnissinnaassuseqartumik iseqarlutik naalaartut isumaqatiginngitsoorsinnaagunanngilaannga oqaruma oqariartuutaa sumilluunniit nutaartaqanngilaq.

Per Berthelsen aamma isumaqarpoq Naalakkersuisut siulittaasuata oqalugiarnerani siunissaq takorloorlugu qanoq isilluni ajornartorsiutinik, oqalugiarnermi asuli qulequttatut taaneqartunik, aaqqiiniarnerit sumilluunniit iserfigineqanngitsut.

- Aamma amigaateqaqaat. Kisianni maluginiarpara Naalakkersuisut siulittaasuaninngaanniit ulamersagaaqisumik inuiaqatigiit naveerneqartut. Soorluli asuli issiaannarsimasut nunannguartik asasartik isasooriartortoq isiginnaaginnarlugu, massakkulli peqataasariaqartut iluamik aqqutissiuunnissaanut. Taama oqariartuuteqarneq oqinaarinninneruallaaqaaq.

Naalakkersuisut siulittaasuata piniarnermut tunngasut Great Greenlandimut tunngatillugu massakkut eqqartorneqartut nunaqarfinnut tunngasut itinerusumik oqaaseqarfigisinnaagaluarai, Per Berthelsen isumaqarpoq.

- Tamaallaat puigorsaatittut taaneqarput nunaqarfinni siulersuisut ataatsimiitinneqarnissaat. Qassissaat tamakku ingerlanneqalerpat? Qulequttat tusartakkagut ukua ukiuni 26-ini tusaanikuuagut.

Kattusseqatigiit Partiaata siulittaasua, inatsisartunilu ilaasortaq Anthon Frederiksen aamma maqaasisaqarpoq:

- Oqartariaqarpunga nutaartaqarpallaanngilaq. Kisianni imarisaa ataatsimut oqaatigissagaanni soorunami ajunngilaq isumalluarnartorpassuarnillu imaqarluni. Apeqqutaaginnarpoq piviusunngortinniarneqarnissaat.

Naalakkersuisut siulittaasuata oqalugiaataani Timersortartut atugaannut tunngasunik, Anthon Frederiksen maqaasisaqarnerarpoq.

- Aningaasanut Inatsisissaq qiviarutsigu timersornermut tapiissutaasartut ukiuni tulliuttuni ikilisinneqartussaapput.

Taamaattorli Naalakkersuisooqatigiit ilinniartitaanermut tunngatillugu anguniagaat naammagisimaarini Anthon Frederiksen oqarpoq.

- Taassuma annertusarneqarnissaa qangali tamatta kissaatiguarsimavarput, minnerunngitsumillu suliffissaqanngitsut sammisassaqartilernissaat. Kisianni amigaataavoq-assit qanoq iliorluni aaqqissuussinissap piviusungortinneqarnissaa, ersarissumik oqaatigineqanngilaq.

Inatsisartut ullumi ataatsimiinnerat naggaserlugu matoqqasumik oqaluuserineqarpoq Inatsisartut ataatsimiititaliaannut ataavartunut siunnersuisoqatigiinnut allanullu ilaasortassanik sinnissussanillu qinersineq. Tassunga atatillugu Demokraatit isumaqarput oqaluserineqartut ammasumik oqaluuserineqaratariaqaraluartut, oqaluuserisassarli matoqqasumik tassa oqaluuserineqarpoq. Kattusseqatigiit Partiaata siulittaasua isumaqarpoq inatsisartuni suleriaatsimik allannguisoqartinnagu ammasumik oqaluuserinninnissaq pisariaqanngitsoq, malittarisassat malittariaqarmata.