Illuatungiliuttut: Nunarsuarmi aningaasarsiornikkut ajornartorsiorneq sammineqanngilaq
Nunarsuarmi aningaasaqarniarnikkut ajornartorsiornerup nunatsinnut sunniutigisinnaasai qulaajaqqullugit Inuit Ataqatigiit piumasaqarput. Kuupik Kleist isumaqarpoq, ingerlatseqatigiiffiit Namminersornerullutik Oqartussanit pigineqartut peqatigalugit tamanna oqaloqatigiissutigineqartariaqartoq.
- Tassami suliffeqarfiit ajornartorsiulerpata tamanna inuiaqatigiinnut tuniluutissammat, Kuupik Kleist oqarpoq.
Kuupik Kleist ilanngullugu oqarpoq, inuiaqatigiit naalakkersuisut inatsisartullu akornanni tatigeqatigiinneq amigaatigineqartoq.
Nunarsuarmi aningaasarsiornikkut ajornartorsiornermut Kalaallit Nunaat piareersimanngitsoq Kattusseqatigiit siulitaasuat Anthon Frederiksen isumaqarpoq.
- Namminersornerullutik Oqartussat suliffeqarfiutaani nunani allani akiitsut 5 mia. koruuni angullugu amerlassuseqarput. Arlaannaataluunniit ajutuunnginnissaa qulakkeerniarlugu aningaasarsiornikkut pilersaarusiortoqartariaqarpoq. Kattuseqatigiit Partiiata siulitaasua Anthon Frederiksen isumaqarpoq.
