Illuatungiliuttut: Nukissiorfinni pisut naalakkersuisup nalunngereertussaagaluarpai

Nukissiuteqarnermut naalakkersuisup naalakkersuisuuffimmini susoqarnersoq nalunngittussaagaluarpaa.

Suleqatigiisstsisut sinnerlugit Inatsisartuni ilaasortaq Tillie Martinussen taama oqarpoq. Taanna inuussutissarsiornermut aatsitassanullu ataatsimiititaliami aamma ilaasortaavoq.

- Taamaattoqalernera Naalakkersuisut ilisimareersimanngimmassuk uggoraara. Isumaqatiginninniutigisimasinnaagaluarpaammi, Tillie Martinussen (SAM) oqarpoq.

Inuit Ataqatigiit politikkikkut oqaaseqartartuata isornartorsiuineq ilalerpaa:

- Naalakkersuisut pikkorluttumik suleriuseqarnerat nutaarsiassaanngitsutut isigivarput.

- Aammalu aaqqissuussinerit pitsaasumik ajornartorsiutinut killitsigani naalakkersuinikkut politikkikkullu piumasaqaateqarneq qulakkeeqqissaarlugu sulinissaq naalakkersuisut naammattumik suliarisimanngikkaat paasinarpoq, Aqqaluaq B. Egede oqarpoq.

Nukissiorfiit allaffeqarfiini katillugit 17-ini ornigulluni sullinneqarnissaq periarfissaajunnaarnissaa ingerlatseqatigiiffiup sapaatit akunnerata siuliani nalunaarutigaat. Atuisunut sullissineq ’digitalinngorsarneqarpoq’ tassani atuisut sullinneqarneri nittartakkatigut ingerlanneqalernissaa siunertaalluni. Atorfiillu 13-it atorunnaarsinneqarnerinik tamanna kinguneqarpoq.

Soraarsitsiortornissarli nukissiuuteqarnermulli naalakkersuisup, Steen Lyngep, maanna unitsikkallarpaa, nassuiaateqartoqarnissaanillu qinnuteqarluni.

AAMMA ATUARUK Naalakkersuisup Nukissiorfinni soraarsitsinissamik pilersaarutit unitsikkallarai

Suliarli tamaanga killereersoq Naalakkersuisut akulerunnerat Suleqatigiissitsisunit eqqumiigineqarpoq.

- Naalakkersuisut Nukissiorfiullu aqutsisui qanimut suleqatigiissimannginneri uggoraara. Nukissiorfiilli namminneq kiffaanngissuseqarlutik suliffeqarfimmut pitsaanerusorisaminnik namminneq aalajangiisinnaanertik. Naalakkersuisulli

arajutsisaqarsimanersut apeqqutaavoq. Nukissiorfiimmi Naalakkersuisut akisussaaffigaat, nammineerlutillu nakkutigisussaallugu susoqarnersoq, Tillie Martinussen oqarpoq, nangipporlu:

- Uani suliami aalajangiussat soraarsitsinermik kinguneqassasoq nalunngereersimanerpaat? Imaluunniit nalusimanerpaat? Tassa taanna apeqqut, naalakkersuisoqarfimmiimi arajutsisoqarsimavoq.

Atassut: Suliassani suliariinnarpaa

Suleqatigiissitsisut isornartorsiuinerannut Atassut akerliuvoq. Nukissiuteqarnermut naalakkersuisup Nukissiorfiit ingerlanneqarneranut akulerunnera taakku ajoriffissaqartinngilaat.

- Una suliniut ataatsimut isigissagaanni isumaqarpunga ajunngitsumik siunertaqaraluarluni qulaajaagassartaqarsimammat taamannak uteriarfigineqartoq. Taamaattumik uparuaatissaqarfigivallaanngilara taannartaa eqqarsaatigalugu, Atassutip siulittaasua Aqqalu Jerimiassen oqarpoq. Naalakkersuisullu suliassani aallummagit nuannaarutigalugu.

- Naalakkersuisup suliassaqarfini suliarigaa malunnarpoq. Suliassaqarfigalugu aallutiinnarpaa paasisaqarfigerusullugu naak kingusinaakanneraluartoq, Aqqalu Jerimiassen oqarpoq.

Naalakkersuisoq Steen Lynge KNR-imit oqaaseqartinniarlugu pissarsiariniaraluarparput, piffissaqanngitsoq allattaata paasissutissiissutigaa.

Allaaserisaq nal. 11:54 nutarterpoq. Tillie Martinussenip oqaasii erseqqissarneqarlutik.