Naleqqameersup Pele Brobergip naalakkersuisutut akisussaaffigisami sisamaasut ilaat marluk ataasinngornermi annaavai. Nunanummi allanut aamma silap pissusianut tunngassutillit akisussaaffigiunnaarpai.Assi: Malik Brøns / KNR

Illuatungiliuttut nikisiterineq pillugu: Akikinaarinninneruvoq

Naalakkersuisut nikisiterineranni ajorsartoq tassaavoq Naleraq. Taama illuatungiliuttut isumaqarput.

Siumukkormiunit Pele Brobergip nunanut allanut tunngasunut naalakkersuisutut akisussaaffimminik arsaarneqarnera akikinaarinninnertut taaneqartoq, Demokraatit Naleqqap akisussaaffimmik pingaaruteqartumik annaasaqarnermini taama annikitsigisumik qisuaateqarnera tupigusuutigaa.

Naleqqameersup Pele Brobergip naalakkersuisutut akisussaaffigisami sisamaasut ilaat marluk ataasinngornermi annaavai.

Nunanummi allanut aamma silap pissusianut tunngassutillit akisussaaffigiunnaarpai.

AAMMA ATUARUK Pele Brobergip kikkut nunatsinni qinersisinnaatitaassanersut oqallisigineqartariaqarsoraa

Maanna inuussutissarsiornermut niuernermullu tunngasut kisiisa akisussaaffigilerpai.

Tamanna pissuteqarpoq qallunaat aviisianut Berlingskemut sapaatiummat siuliani oqaaseqarnera erngerluni politikkikkut aalassatsitsinermik malitseqartoq. 

Pele Brobergimmi nunatsinni namminiilivinnissamut kikkut taasisinnaatitaassanersut oqallisigineqartariaqartoq Berlingskemut oqaatigaa.

- Thailandimiut, Danmarkimeersut, tuluit, Frankrigimeersut, Spaniamiut, allalluunniit nunatsinni najugallit nunatta namminiilivinnissaanut taasititsinermi peqataanissamut pisinnaatitaaffeqanngitsut ersarippoq. Tassa naggueqatigiit inuit. Nuussimasutut qanoq misigisimaneq isumaqarnerlu taasinissap oqallisigineqarnissaani matumani pingaaruteqanngillat, Pele Broberg Berlingskemut oqarpoq.

AAMMA ATUARUK Pele Broberg er ikke længere naalakkersuisoq for udenrigsanliggender

Taamalu oqaaseqarnera politikkikkut aalassatsissutaavoq.

Naalakkersuisummi siulittaasuata nunanut allanut tunngasunut naalakkersuisuni sapaatiummat  siuliani unnukkulli naqqissuuteqarfigereerpaa:

- Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq, naqqiummi ilaatigut atuarneqarsinnaavoq, Múte B. Egede Pele Brobergimut naqqiissuteqarnermini allappoq.

Akikinaarinnipput

Siumup politikkikkut oqaaseqartartuata, Vivian Motzfeldtip, nunanut allanut tunngasunut akisussaaffik naalakkersuisut siulittaasuanut naalakkersuisooqataasunit annertunerusumik qisuarfigineqarani tunniunneqarnera tupigisuutigaa.  

AAMMA ATUARUK Atassutip Pele Broberg pillugu nikititerisoqarnera ilorrisimaarutigigaa

- Tupigaara taama akikitsigisumik naalakkersuisuuffik pingaaruteqartorujussuaq naalakkersuisooqataasut tunniummassuk, Vivian Motzfeldt oqarpoq, nangillunilu:

- Qulequtaq taanna pingaaruteqaqimmat naalakkersuisoqatigiinnerup iluani pisut piffissami kingullermi saqqummiussuunneqartut aallaavigalugit uanga arsaarsinertut isigaara.  

Demokraatinit aamma Naleqqakkut tupigineqarput.

- Naalakkersuisoqarfik isumalluarfigineqarnikuutigisoq, pingaaartumik naalakkersuisuusimasup qinersisaaninngaanniit, tupigusuutigaara peerneqarnera taama annikitsigisumik qisuariarfigineqartoq, Demokraatit siulittaasuat, Jens-Frederik Nielsen oqarpoq.

AAMMA ATUARUK Múte B. Egede Pele Broberg pillugu nikititerisoqarnermut: Aaqqiissut taanna pitsaanerpaavoq

KNR-ip Pele Borberg naalakkersuisuni nikinneq pillugu ataasinngornermi oqaseqartinniaraluarpaa, taassumali Naalakkersuisut siulittasuat Múte Bourup Egede oqaloqatigiinnaaqquaa.

- Naalakkersuisoqatigiinninngaanniit aaqqiissutissanik ujartuinissaq inuiaqatigiillu qitiutillugit sulinissaq ingerlariaqqinnissarlu tunngavigalugu isumaqatigiissuteqarpugut, taamaammat nunanut allanut naalakkersuisoqarfik uannit akisussaaffigineqarnissaa aaqqinneqarpoq, Múte B. Egede KNR-imut ataasinngornermi oqarpoq.

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat