Naalakkersuisunngortut suleqatiserinninnertik timitalissaneraat Hans Enoksenip pissanngatigaa.Assi: KNR

Illuatungiliuttut neriorsuutinut: Oqarluartaarnerit timitalerneqaqqaartariaqarput

Naalakkersuisooqatigiilersut partiit allat suleqatigilluassallugit neriorsuipput. Tamannali timitalerneqassanersoq illuatungiliuttut pissanngatigaat.

Patajaassuseq, ammanerusumik aqutsineq suleqatigiinnerlu pitsaanerusoq.

Demokraatit, Siumut Nunatta Qitornaallu naalakkersuisoqatigiilernerminni oqaatsit kusanartut piviusunngortittariaqartut illuatungiliuttuni partiit arlaqartut isumaqarput.

Kim Kielsenip (S), Vittus Qujaukitsup (NQ) Nivi Olsenillu (D) tusagassiortunik katersortitsigamik Naalakkersuisuni suliniutissatik, tassaasut patajaassuseq partiinillu illuatungiliuttunik mikinerusunik pitsaanerusumik suleqateqalernissaq naalakkersuisooqatigiit siuttuisa neriorsuutigaat.

AAMMA ATUARUK Ny koalitionsaftale: Det vil Naalakkersuisut arbejde for

Taama neriorsuineq Inuit Ataqatigiit siulittaasuata Muté B. Egedep nuannaarutigaa, timitaliinissarli alaatsinaanniarnerarpaa.

- Naalakkersuisuni taarseraannerit oqaluttuarisaanermi aatsaat taama amerlatigisut pipput. Siammasissumik suleqatigiinnissamik oqalunnerat, tassa oqaasiinnaanani timitalimmik ingerlatsiviujumaartoq neriuuteqarfigaarput, Muté B. Egede KNR-imut oqarpoq.

Inatsisartunut 2018-imi qinersinermi naalakkersuisoqatigiinnissamik isumaqatigiissutit una sisamaraat.

Nuannareqqusaarneq

Takorluukkat piviusunngortinneqarnissaat Tillie Martinussenip Suleqatigiisitsisuneersup neriuutigaa.

Naalakkersuisulli pitsanngorsaaniarlutik neriorsueriarlutik politikkikkut eqqissiviilliortartut taassuma eqqaamavaa.

- Naalakkersuineq patajaassimanngeqisoq isumaqarpugut. Demokraatillu siusinnerusukkut naalakkersuisoqataajumallutik aalajangiinnarsimannginnerat uggoraarput. Taakkuli ilanngunnerannit suleqatigilluarneqalerumaarnerput neriuutigaarput, Tillie Martinussen oqarpoq.

 

AAMMA ATUARUK Ataatsimut isigalugu: Naalakkersuisut nutaat aaku

- Nunannarineqannginneq qinersisinillu annaasaqarsimaneq anigorniarlugit nuannareqqusaarnerusutut una isigaara. Naalakkersuisut taamaalioriarmata ulluni 100-ni saamasaarfigisinnaanngilagut, Tillie Martinussen oqarpoq.

Coronavirusip kipiluttunarnera Demokraatit ikorfartortaajunnaarlutik naalakkersuisooqataalernissaminnut tunngavilersuutigaat.

"Politikkikkut patajaatsumik, periataarsinnaassusilimmik aalajangiisinnaassuseqartumillu nunatta siulersorneqarnissaa” naalakkersuisooqatigiilersut qulakkeerniassammassuk.

Coronavirusilli ajornartorsiortitsinera naalakkersuisooqatigiinnik allanngortitsinissamut tunngavigissallugu naammanngitsoq, Partii Naleraq isumaqarpoq.

- Corona kisiat tuppallersaatigalugu akuersaarsinnaanngilagut imaaliallaannaq. Tassami inuiaqatigiit kaasarfimminnit namminneq akiliisussaapput, Partii Naleqqap siulittaasua Hans Enoksen oqarpoq.

 

AAMMA ATUARUK Overblik: Her er de nye naalakkersuisoq

Naalakkersuisut suleqatiginninnermut pitsanngorsaajumallutik oqariartuutaat taassuma illuatungiliuttoqatimisulli timitalerneqaqqaartinnagu oqaasiinnaanissaa ernummatigaa. Naalakkersuinikkullu aalaqqajunneq "ingerlatsilluannginnermik" aamma "pisut qanoq ingerlanerliortiginerinut" takunnikkusunnginnermik ersiutaanerarpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat