Illuatungiliuttut naveersiniarput

Allattoq Najaaraq Egede
apriilip 26-at 2006 11:01

Inatsisartut ullumi ataatsimiinnerat aallartippat Ineqarnermut Attaveqarnermullu Naalakkersuisoq Jørgen Wæver Johansen aamma Inuussutissarsiornermut Naalakkersuisoq Siverth K. Heilmann, Naalakkersuisooqatigiinnut illuatungiliuttunit Demokraatinit avoqqaarineqassapput Inatsisartuni oqaluuserisassatut siunnersuutigisaminnik piffissaq eqqorlugu tunniussisimanngimmata.

Jørgen Wæver Johansenip Inatsisartuni oqaluuserisassatut siunnersuutaa immikkoortoq 24, tallimanngorpat oqaluuserineqartussaagaluartoq piffissaagallartillugu anngunneqarsimanngimmat Demokraatit ullumikkut kaammattuuteqassapput Jørgen Wæver Johansen Inatsisartut ataatsimiittarfianni taasisitsinikkut avoqqaarineqarluni uparuarneqartariaqarneranik.

Taamatuttaaq Naalakkersuisuni ilaasortaq Siverth K. Heilmann, Inatsisartuni oqaluuserisassatut siunnersuumminik marluusunik suli aamma nassiussaqarsimanngilaq.

Tamanna pillugu Demokraatit ullumi kaammuttuuteqassapput, Siverth K. Heilmann, Jørgen Wæver Johansen-itulli iliuuseqarfigineqartariaqartoq, tassa Inatsisartut ataatsimiittarfianni taasisitsinikkut avoqqaarineqarluni uparuarneqartariaqartoq.