Illuatungiliuttut Naalakkersuisooqatigiinnissamut isumaqatigiissut nalilersorpaat
Isumaqatigiinniaraluarnerminni anguniakkatik arlallit isumaqatigiissutaasumi ilisarisinnaavaat.
- Siunnersuutigut allanngortinnagit ikkussuussimagamikkit, taanna iluarisimaarparput, Partii Naleqqami siulittaasoq Hans Enoksen oqarpoq.
IA-mi Naleqqamilu siulittaasut isumaqatigiissummi amerlasuutigut isumaqataaffeqaraluarlutik misissorluarneranni ernumassuteqarput.
Aamma atuaruk IA-p siulittaasua: Isumaqatigiissut pitsaasunik imaqarpoq
Namminersortunngorsaaniarneq ernumanartoqartippaa
Naalakkersuisooqatigiinnermut isumaqatigiissummi allaqqavoq pisortat pigisaasa ingerlatseqatigiiffiit namminersortunngorsarneqarnerat aqqutigalugu pisortaniit inuussutissarsiutini akulerusimaneq annikillisarneqassasoq.
Pisortat pigisaannik namminersortunngorsaaniarneq Sara Olsvigip ernumanartoqartippaa.
- Namminersortunngorsaaniarneq soorunami ilungersuutassaasutut isigaarput, avinngarusimanerusut nunaqarfiillu tassuunatigut eqqornerlugaasinnaapput annertuumik. Pisortat pigisaat aqqutigalugit ullumi kiffartuussinerit assigiinngitsut nunaqarfinnut avinngarusimanerusunullu qulakkeersinaavagut, Inuit ataqatigiit siulittaasuat, Sara Olsvig oqarpoq.
Pisortat pigisaasa namminersortunngorsarnissaasa pillugit Naalakkersuisooqatigiinnermut isumaqatigiissummi allaqqavoq periusissanik iliuusissanillu pilersaarusiortoqassasoq innuttaasunik sullissineq ajorseriannginnissaa qulakkeerniarlugu. Aatsaallu taakku naammassippata Inatsisartunut isummerfigisassanngorlugu saqqummiunneqarumaarluni.
Aamma atuaruk Naalakkersuisooqatigiilersut tusagassiortunik katersortitsinerat takoqqiguk
Partii Naleqqap aamma ernumanartoqarsoraa
IA-p siulittaasua assigalugu Partii Naleqqap isumaqatigiissummi ernumanartoqartitsivoq:
- Mittarfissualiornissaq soorunami aningaasat aamma suminngaanniissanersut, taavalu aamma isumaqatigiissutit iluani ilaatigut selskabit akileraarutai apparsarneqassasut allallu, aningaasat suminngaanniissanersut taakku ujartornissai ilungersunalaassaaq, Partii Naleqqami siulittaasoq Hans Enoksen oqarpoq.
Qinersinissap tungaanut IA-p Uranimut apeqqut pillugu innuttaasut isumai paasinissaat kissaatigisimavaat. Isumaqatigiinniarnernilu qulequttanut ilaasimalluni. Sara Olsvigilu malillugu Siumukkunnik isumaqatigiinniarnerminni ilanngussimagaluarpaat uranimik akulinnnut akuisa 0,1 procentimik qaffasinnerpaaffissalerneqassasoq.
Aamma atuaruk IA urani pillugu Kielsenimut naapeqatigiissutissaqarsimagaluarpoq
Siumut, Atassut demokratillu isumaqatigiissutigiligaanni allatut allaqqavoq, tassa uranimik qaffasinnerpaaffilerneqarnissaat pillugu naalakkersuisooqatigiit inatsisartunut saqqummiussissasut:
- Kisianni soorunami oqarsinnaavunga, pitsaanerulaarpoq Inatsisartuni aalajangiutsinniaramikku, uagut suli pitsaanerpaasutut isigigaluarparput innuttaasut tassunga aalajangiinermut peqataatinneqassasut, Sara olsvig oqarpoq.
Suliassanik naammassisinnaanerat ilimaginngilaa
Isumaqatigiissutissaq tamakkiisumik isigalugu anguniakkat arlallit isumaqatigiissusiami allanneqarsimapput, taamaattumik Naalakkersuisunngortussat suliassatik naammassisinnaaneraat Hans Enoksenip ilimaginngilaa:
- Nunatsinni aningaasarsiornikkut inissisimaffipput massakkut ilungersunartorujussuugami, suut tamarmik ammukarput, taava aningaasalersugassagut oqimaalliartorput, taamaakkami ilimananngilaq tamarmik 2018-imi naammassineqarsimanissaat, Hans Enoksen KNR-mut taama oqarpoq.
