Illuatungiliuttut Karl Tobiassenimut sakkortuumik isornartorsiuisut: Inatsisinik unioqqutitsineq tatiginnikkunnaarsitsivoq
Aalisarnermut piniarnermullu naalakkersuisup, Karl Tobiassenip aamma Inatsisartuni Aalisarnermut, Piniarnermut Nunalerinermullu ataatsimiititaliap akornanni siunersiuineq sisamanngornermi nalunaaqutaq marlunut aallartippoq.
Siunersiuineq tikaagulliit pillugit suliamut tunngassuteqarpoq, Aalisarnermummi piniarnermullu naalakkersuisoqarfik inatsisinik unioqqutitsisimaneq pillugu ombudsmandimit sakkortuumik isornartorsiorneqarpoq.
Tamannalu pissutigalugu Karl Tobiassen ataatsimiititaliamit ullumi siunersiorneqartussaavoq, illuatungiliuttuniillu politikerit isornartorsiuipput.
Inatsisinimmi ataasiaannanngitsumik unioqqutitsisoqarnera tatiginninnginnermik pilersitsisoq illuatungiliuttut oqarput.
Karl Tobiassenip ataatsimiinneq aallartillugu ombudsmandimit isornartorsiuineq ilungersunartumik tiguneqartoq naalakkersuisoqarfimmilu inatsisinik malinninnissaa pingaaruteqartoq oqaatigaa.
- Akissutissarput piareerpat ombudsmandimut susoqarsimanera nassuiaatiginiarlugulu ataatsimiititaliaq ilisimatinniarparput, Karl Tobiassen oqarpoq.
Ombudsmandip isornartorsiuinera
Suliaq ataasinngormat aallartippoq. Naalakkersuisoqarfimmi tikaagullittassiissutinut qinnuteqaammut itigartitsisimanera pissutigalugu ombudsmandi, Vera Leth sakkortuumik isornartorsiuivoq.
Naalakkersuisoqarfiup Naalakkersuisut 2021-mi aalajangiinerat tassunga taarsiullugu innersuussutigaa.
Taamaaliortoqarsinnaanngilarli, taamaammat ombudsmandip suliap suliarineqarnera “ernumanartuunerarpaa”.
Aalisarnermut Piniarnermullu Naalakkersuisoqarfimmi inatsisinik unioqqutitsisumik aappassaanik iliuuseqarpoq.
Demokraatit siulittaasuat, Jens-Frederik Nielsen siunersiuinermi aamma peqataavoq. Taanna Inatsisartuni Aalisarnermut, Piniarnermut Nunalerinermullu Ataatsimiititaliap siulittaasuata tullersortitaa, taassumalu naalakkersuisoqarfiup suliani iliuuserisimasai ilorrisimaarutiginngilluinnarpai.
Siunersiuinermilu siunissami assingusumik pisoqaqqinnginnissaanut qanoq iliuuseqarniarnersut Karl Tobiassen apeqquteqarfigaa.
- Inuiaqatigiinnut sunniuteqarput, innuttaasullu uagutsinnut tatiginnissinnaasariaqarput. Aappassaanik taama pisoqarpoq. Taama pisoqarnera uagutsinnut politikerinut tatiginninnginnermik pilersitsivoq. Qanoq taama pisoqarsinnaava qanorlu ilillusi taama pisoqaqqinnginnissaa qulakkiissavisiuk?
Naalakkersuisup nalunaarummi takkuttoqarnissaa neriorsuutigaa.
- Suliaq ingerlavoq, tamannalu tuaviuussassatut isigaarput, Karl Tobiassen oqarpoq.
Taassuma naalakkersuisoqarfik inatsisinik tunngavissarsiuleruttortoq oqaatigaa, taamaalillunilu inatsisit malinneqarnissaat qulakkeerneqassalluni.
KNAPK tatiginnikkunnaartoq
KNAPK aamma isornartorsiuinikuuvoq.
Aalisartut piniartullu kattuffiat suleqatigiinnermik pitsaanerulersitsiniarluni naalakkersuisoqarfimmut arlaleriarluni saaffiginnippoq.
Suleqatigiinnerli taanna iluatsissinnaanngitsoq, siulittaasoq, Nikkulaat Jeremiassen nassuiaavoq.
- Naalakkersuisumut allagaqarput tatiginnikkunnaarnerpullu nalunaarutigalugu. Aalisarnermut, Piniarnermullu naalakkersuisoqarfimmut arlalippassuariarluta saaffiginnissutinik allattuartaraluarpugut akineqanngisaannarpugulli, taamaattumik tatiginnikkunnaarluta nalunaarfigaagut.
KNAPK-miilli isornartorsiuinermut atatillugu Karl Tobiassen allatut nassuiaavoq. Taasusmami kattuffik arlaleriarluni attaviginiartarsimasoraa.
- KNAPK-p tatiginnikkunnaarnermik nalunaaruteqarnera ajuusaarutigisorujussuuarput. Kisianni eqqarsarnartoqartipparput, uagummi arlaleriarluta attaviginiartarpagut, akineqartarlutillu.
Ataatsimiititaliap siulittaasua, Hans Aronsen (IA) ataatsimiinneq naammassillugu ima oqarpoq:
- Naalakkersuisup suliai maanna isumaliutiginiarpagut, kisianni akissutinnut maanna qujanaq.