Jens Napãtôq suliamik aniguinini nuannaarutigaa.Assi: KNR / Malik Brøns

Illuatungiliuttut isumaqatigiinngitsut: Napaattooq akikinaariva?

Napaattuumut suliaq tunngasoq politiinit unitsinneqarpoq. Taamatullu iliuuseqarsimanera politikkikkut kinguneqartinneqartariaqaraluartoq, Demokraatit isumaqarput. Siumulli tikkuartuerusunngilaq.

Jens Napãtôq Facebookimi videoliami inooqatiminut siorasaarisutut Siumumit politiinut unnerluutigineqaraluarpoq.

Suliaq maanna kinguneqartinneqarani naammassineqarpoq. Kalaallit Nunaannimi politiit suliaq eqqartuussivilersuunneqartariaqanngitsoq aalajangerpaat.

Taamatullu aalajangerneq Siumut siulittaasuanni tusaatissatut tiguneqarpoq.

AAMMA ATUARUK Siumut har meldt Jens Napaattooq til politiet

Siumut taamani unnerluussinermini nakuuserneq akuersaarsinnaanngilluinnaritsik tunngavilersuutigigaluarpaat.

- Uanga isumaqanngilanga oqippallaartoq. Malitassatsinnik malitaqarpugut aammalu taakku malitassat malillugit suliassat ingerlanneqartarput., Erik Jensen oqarpoq nangillunilu:

- Partiini arlalinni aamma taamaattoqarpoq nalunngilarput. Kisianni inuunermi aamma suugaluartulluunniit ilinniutaasarput taamaattumik inuiaqatigiinni immitsinnut tikkuartuunnersuaq nakkarsaanersuaq piunnaarlutigu immaqa immitsinnut ikioqatigiinneq annertunerusariaqartoq takusinnaasariaqarparput.

AAMMA ATUARUK Erik Jensen Hammond pillugu: Nukiit tamaasa atorfissaqartippagut

Siumukkullumi namminneerlutik ilaasortarisimasartik Aleqa Hammond aappassaaneerluni pisortat aningaasaataanik namminermut atuereernerata kingorna partiimiit anisissimasartik maanna uterteqqeqqammerpaat.

Demokraatit: Politikkikkut kinguneqartariaqarpoq

Suliap eqqartuussivimmut tunngasortaa naammassineqarnera, Jens-Frederik Nielsenip tusaatissatut tiguaa. Jens Napaattuullu iliuuserisimasaminit ajornanngippallaartumik aniguisoq, taanna isumaqarpoq:

- Taamanikkut pisoq eqqarsaatigissagaanni amiilaarnaqisumik saqqummiunneqartoq, politikkerit tamattaalluta amiilaarpugut, maannakkullu piffissaq siuartilaariarutsigu taava susoqanngilaq, Jens-Frederik Nielsen oqarpoq.

AAMMA ATUARUK Tusagassiuutit: Politiit Jens Napaattuumut tunngatillugu suliaq unitsippaat

Demokraatit siulitaasuat naapertorlugu politikereq angerlarsimaffimmi imigassartorsimalluni eqqissiviilliortitsisoq - pingaartumillu meeqqat akuutinneqartut, kinguneqartinneqartariaqarsorigaluarpaa:

- Taamatut inerneqarnera politikkikkut apeqquserneqarsinnaavoq pingaartumik naalakkersuisoqatigiit meeqqaat pingaartitsigalugit immikkut allaat naalakkersuisoqarfiliuullugit, Jens-Frederik Nielsen oqarpoq.

Allaammi Jens Napãtôq siulittaajunnaarsinneqarsinnaasoq taassuma tikkuartorpaa.

- Killormut ataatsimiititalianut pingaartunut inissinneqarpoq. Taanna soorunami inuttut uggoraara, isumaqarpunga politikkerit maligassiuisussaalluta politikkeriusussaagaluarpunga tamakkuninngarpiaq naaggaartut.

Jens Napãtôq suliamut sunnerteqqasoq

Pineqartoq KNR-imit apersorneqarusunngilaq. Taanna suliamut misigissutsimigut sunnertisimanini peqqutigalugu apersorneqarnissani kissaatiginngilaa.

Taamaakkaluartorli aviisimut AG-mut ilaatigut ima akissuteqarpoq:

- Tamanna tupaallaatiginngilara. Taamatut inerneqarnissaa ilisimajuaannarsimavara.

AAMMA ATUARUK IA, Naleraq Atassullu: Timikkut tarnikkullu persuttaaneq akuersaanngilluinnarparput

Demokraatit isornartorsiuineranut tunngatillugu Múte B. Egede KNR-imiit oqaaseqartinniarlugu aamma attaveqarfiginiarsarivarput.

Qinigaaffiup siuliani Inuit Ataqatigiit, Naleraq Atassullu illuatungiuliuttoqatigiillutik nakuusernermut akerliungaatsiarnikuupput.

Partiit pingasut, Inuit Ataqatigiit, Naleqqap Atassutillu siulittasui ataatsimoorlutik nalunaaruteqarlutik ima allapput:

- Partiini siulittaasut ataani atsiortugut naqissuserlarput timikkut tarnikkullu -persuttaaneq akuersaanngilluinnaratsigu, taamatuttaarlu meeqqap illersugaanera sutigut tamatigut salliutikkatsigu, partiit pingasut siulittaasui taama allapput, nangillutillu:

- Uniorlugillu pisoqarsimappat iliuutsit tamakku kinguneqartinneqartassammata.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat