Illuatungiliuttut: Illuut A/S pillugit borgmesterinut isumaqatigiissuteqartoqanngilaq.

Ineqarnermut naalakkersuisoq Jens B. Frederiksen oqarpoq, kommunimik oqaloqatiginninnini nammineq isumaqatigiissuteqarnertut inernilerini.

Kisianni Naalakkersuisut eqqunngitsumik oqaluttut, illuatungiliuttut aalajangiusimavaat.

- Tipskuponimik tunineqarpugut, 1-imilluunniit 2 pinnagit taasisussissutigilertussanngorlugu. Kina ilumoorpa kinalu sallua, Kuupik Kleist, Palle Christiansen imaluunniit Jens B. Frederiksen? Pingasunik periarfissaqarpoq, Siumut aningaasaqarnermut oqaseqartartua, Per Berthelsen oqarpoq.

Inatsisartunut ilaasortap Hans Enoksenip allakkatigut apeqqutaanut Naalakkersuisunut ilaasortap, Jens B. Frederiksenip allakkatigut akissutaa pineqarpoq.

Ineqarnermut naalakkersuisoq Jens B. Frederiksen borgmesterillu sisamat sanaartornissamut tunngasut pillugit septembarip pingajuani pitsaasumik ataatsimiipput. Illuut A/S Jens B. Frederiksenip tassani aamma saqqummiuppai.

- Illuut A/S-ip pilersinneqarnissaa ajorineqanngitsoq, uagullu suliaq ingerlateqqissagipput isumaqatigiippugut. Misigisimavunga allakkatiguunngikkaluartoq isumaqatigiilluta. Kommuninik oqaloqatiginninnerit ajunngitsutut misigisakka, Inatsisartuni taamatut atorneqarmata uggoreqaara.

Inatsisartunut sallunissaq eqqunngitsumilluunniit paasititsinissaq siunertaanngilaq, Jens B. Frederiksen oqarpoq.

Illuatungiliuttut Naalakkersuisunut ilaasortamik tatiginnikkunnaarnermik taasinissamik siunnersuutaat ippassaq pinngitsoortinneqarpoq, naalakkersuisoqatigiit partiivi Inatsisartut tatiginnillutik nalunaaruteqarnerannik taasisoqarmat.