Inatsisartut ataatsimiititaliai Illuatungiliuttut ilaasortaatitaqarsinnaagaluarput
Inatsisartuni illua tungiliuttut ataatsimiititaliani ilaasortaatitaqartitsinnginnerat illua tungiliuttunit isornartorsiorneqarput.
illua tungiliuttulli mattunneqanngitsut, Naalakkersuisoqoqatigiit isumaqarput.
Inuit ataqatigiit gruppianni siulittaasoq Mimi Karlsen naapertorlugu illua tungiliuttut ataatsimiitsitaliani ilaasortaatitaqannginnerat peqqutissaqarpoq:
- Kisitseriaaseqarpoq. Kisitseriaasillu taassuma ajornartippaa amerlanerni ingammik tallimaagaangata illua tungiliuttut ilaanissaat, Mimi Karlsen taama oqarpoq.
Inatsisilli oqaasertaani taama oqartoqarneq kukkuneruvoq. Inatsisartut inatsisaat pillugit immikkoortortaqarfimmi siunnersortaaneq Kent Fridberg KNR-imit oqaloqatigineqarluni taama oqarpoq, taassumalu nassuiarpaa partiit qinernereqarnerat aallaavigalugu kikkut ataatsimiititaliami ilaasortaasinnaanersut aalajangersinnaagaat.
Tassalu partiit nammineerlutik aalajangersinnaavaat kikkut ataatsimiititaliani ilaasortaassassanersut,
tassalu Mimi Karlsen partiillu naalakkersuisooqataasut sinnerisa illuatungiliuttut ataatsimiititaliani suleqataassanersut nammineerlutik aalajangersinnaavaaat.
Illua tungiliuttunullu tamanna ajuusaarnartoq Demokraatit siulittaasuat oqarpoq.
- Soorunalimi politikkikkut anguniakkatsinni aammalu pingaartitatsinni peqataatitsisinnaannginnerput taanna ajuusaarnarpoq, Randi Vestergaard Evaldsen taama oqarpoq.
Taamaakkaluartoq ataatsimiitsitaliami illua tungiliuttut ilaatinneqanngikkaluarlutik mattunneqanngitsut Naalakkersuisoqatigiinneersoq oqarpoq.
- Eqqartorneqartut tamarluinnaqqissaasa inersuarminngaaniit eqqartorneqartarput. Tassani allatanik apuussisoqartarpoq, oqaaseqarfigineqartarput, aamma illua tungiliuttuninngaaniit, Mimi Karlsen taama oqarpoq.
Demokraatit ataatsimiititaliamut ilaanngikkaluarlutik nukittuffeqarnertik atorluarniarlugu KNR-mut erseqqissaassuteqarput.
- Ilinniartitaanermut ataatsimiitsitaliami peqataatitaqanngilagut. Kisianni aamma nukittuffigilluinnartuugatsigu aamma qularinngilarput oqariartuutigut allatigut aniatikkumaartarlutigit inersuarminngaaniit aammalu tusagassiuutitigut
Demokraatit siulittaasuat Randi Vestergaard Evaldsen KNR-mut taama oqarpoq
