Illuatungiliuttut Folketingimi oqallitsitsipput

CIA-p Kalaallit Nunaannut aqqusaartarsimanera pillugu Folketingimi ullumi nalunaaquttap akunnerini pingasuni oqallittoqarpoq.

Danmarks Radiomit pisimasulersaarutip aallakaatinneqarnerata kingorna naalakkersuisunut illuatungiliuttut tuaviuussamik apeqquteqaateqarmata oqallittoqarpoq.

Naalakkersuisunut illuatungiliuttut CIA-p aqqusaartarsimaneranut tungatillugu arlaannaannulluunniit attuumassuteqanngitsunit misissuisoqarnissaanik piumasaqaateqaraluarnerat amerlanerusunit tapersersorneqanngitsoorpoq.

Malou Aamundip Ny Alliancemiit Venstrenut nuunneratigut naalakkersuisut amerlanerussuteqaqqalaaqqilermata. Naalakkersuisut pisimasunut tunngasunik nutaanik saqqummiussaqanngillat, taamaattorli Nunanut Allanut ministeri, Per Stig Møller Kalaallinik Savalimmiormiunillu ilaasortalimmik misissuisussamik suleqatigiissitaliulerpoq.

Isumaqarpunga arlaannaannulluunniit attuumassuteqanngitsunik misissuisitsiniaraluarneq periaaseq siulliarsuppalaarpallaartoq, isumaqassanngilagummi ilisimatooq Danmarki, Savalimmiut Kalaallit Nunaalluunniit sinnerlugu imaluunniit tusagassiortoq misissuiartorluni CIA-p qullersaqarfianut Langleymiittumut isiinnarsinnaassasoq paasissutissanillu aallerluni, soorlu aamma amerikamiut misissuiartortitaat Kalaallit Nunaannukaannarsinnaanngitsoq Nuummilu susoqarneranut tunngasunik paasissutissanik tunineqaqqulluni piumasaqarluni. Taamaammat maanna uagut misissuisitsilerpugut tassanilu Kalaallit Nunaat Savalimmiullu ilaatinneqassapput, taamaalilluta soorlu Kalaallit Nunaanni nalunnginneqartut ilimagineqartullu tamarmik qulaajarneqarsinnaaniassammata. Eqqaasitsissutigissavarali Narsarsuarmi mittarfik Kalaallit Nunaata 1987-imili akisussaaffigilernikuummagu. Juliane Henningsenip oqaatigigaluarpaa Danmarkimi naalakersuisut imminnut misissussanngitsut, siornatigulli misissuisarnitsinni takusareerparput misissuinerlussimagaangatta isornartorsiorneqartarpugut, tatigineqarunnaarsinnaallutalu, taamaammat soorunami misissuilluarniartussaavugut, allatullu oqalunneq pasisaariniutitut isigiinnarpara. Ilimagineqassanngilluinnarpoq uanga arlaannik Kalaallit Nunaat pillugu nalunngisaqarnissara kalaallit politikeriinut isertuussannik, taamatut suleriaaseqanngilagut, oqaruma Kalaallit Nunaannut tunngasut arlaat imaassinnaavoq nalusimagikka, utoqqatserpungalu kisianni tassa ilisimasaqarfigisimassanngilakka. Kalaallit Nunaannik suleqateqarnerput iluaraara, paasisinnaalluarpakkalu Kalaallit Nunaanniit isumakuluutigineqartut, maannakkullu misissuiniarnerput aalajangiunneqarmat qaaqqusillunga ingerlaannaq Hans Enoksenimut sianerpunga, Folketingimi oqallinnerup kingorna Nunanut Allanut ministeri, Per Stig Møller oqarpoq.

Inatsisinik atortitsinermut ministeri, Lene Espersen inatsisinik atuutsitsinermut ataatsimiititaliamik aqagu ataatsimeeqateqarnermini amerikamiunit tigusat pillugit naalakkersuisut ilisimasaat saqqummiuttussaavai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat