Illuatungiliuttut: Avissaartuunneq toqqissisimananngilaq
Kangia-Kitaata kommunissaani avissaartuullutik aallartereersunik aqutsisoqalernissaa toqqissisimananngitsoq illuatungiliuttussat Siumut aamma Atassullu isumaqarput.
- Demokraatini pisoq innuttaasunut toqqissisimanngilaq akuersaarneqarsinnaananilu. Taamaammat Siumup aamma Atassutip aqutsineq patajaatsoq aammalu innuttaasunik sullissinerup pitsaassusianik salliutitsisoq tunngavigalugu suleqatigiinnermik pilersitsiniarluni oqaloqatigiinnerit aallartinneqarnissaannut tamakkiisumik piareersimagatta, suleqatigiit allapput.
Inuit Ataqatigiit, Demokraatit Per Nukaaraq Hansenilu, Kangia-Kitaani suleqatigiinnissaminnut toqqammavissaminnik anguniagassaminnillu innuttaasunut manna tikillugu saqqummiussinikuunnginnerat innuttaasunik sullissilluarnissamut toqqammaviliinngitsoq, suleqatigiit nalilerpaat.
Suleqatigiit ilaatigut borgmesterimik Nikolaj Heinrichimik, inatsisartuni ilaasortanit Doris Jakobsenimit, Siumumeersumit, aamma Emilie Olsenimit, Atassummeersumit inuttaqarput.
Kangia Kitaanimi Ikaarsaariarnermut Ataatsimiititaliap inissititernissaa pilersaarutit malillugit pissappat tallimanngorpat maajip ulluisa aappaanni 2008 pisussaavoq.
