Ammasumik allagaq Inuit Ataqatigiit siulittaasuannit, Múte Borup Egedep, Partii Naleqqap siulittaasuanit Hans Enoksenimit, Atassutip siulittaasuanit Aqqalu Jerimiassenimit, Suleqatigiissitsisullu siulittaasuannit Tillie Martinussenimit atsiorneqarpoq.Assi: Malik Brøns

Illuatungiliuttut ataatsimoorlutik Naalakkersuisut isornartorsiorpaat: Coronap akiorniarneranut ataqatigiittoqanngilaq

Corona pillugu malittarisassat illuatungiliuttunit kisimi paasisinnaannginneqanngillat. Kattuffiit qassiiusut KNR-imut aamma taama uparuartuiuarput.

Inuit Ataqatigiit, Partii Naleraq, Atassut Suleqatigiissitsisullu ataatsimoorlutik Naalakkersuisunut nalunaaruteqarput: Illuatungiliuttut tusarnaarneqanngitsutut misigisimapput.

Aamma corona pillugu malittarisassat katerinnissamut atatillugu tukallutillu ataqatigiinngitsut isumaqarput.

- Nunatsinni Covid19-ip akiorniarnerani ulluinnarni inuunitsinnut, peqqinnissamut inuussutissarsiornermullu sunniutigiligaanut killiffik arlalinnik ernumanartortaqartillugu maanna allaffigaassi, Naalakkersuisunut ammasumik allakkami allassimavoq.

AAMMA ATUARUK KNAPK Sulisitsisullu: Naalakkersuisut ilaatinnata aalajangiisarput

- Isumaqarpugut Naalakkersuisut ilaatigut nalunaarusiornermikkut suliaat maanna tukallutillu ataqatigiinngitsut. Tamanna Naalakkersuisunut partiit siuttuisa ataatsimiinnerini ataasiarnata apuuttareerparput tusaaneqanngitsumilli.

Katersuunnissamut malittarisassat

Inuit amerlanerpaamik 100-it januarip ulluisa 31-ata tungaanut illup iluani katersuussinnaapput. 

Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa." 

Illuatungeriit corona pillugu malittarisassanik paasinnissinnaanngitsuni kisimiinngillat. Kattuffiit qassiiusut tamanna KNR-imut aamma uparuartortuarpaat.

Naalakkersuisunit akissuteqanngitsoq

Inuit amerlanerpaamik 100-it kisimik illup iluani katersuuteqqusaanerannut inuillu amerlanerpaamik 250-it silami katersuuteqqutaanerannut peqqussutit januaarip ulluisa 31-annut atuupput. Aammattaaq kommunimit kommunimut allamut angalalluni aaqqissuussinernut peqataajartoqqusaanngilaq – politikerit kisimik taamaaliorsinnaapput.

Assersuutigalugu Siumut nuna tamakkerlugu Ilulissani septembarip ulluisa sisamaanit arfernanut ataatsimeersuassaaq, nunatsinniillu sumiiffinnit amerlanerpaaneersunit 68-it peqataassallutik.

Nalunaarutilli oqaasertai ersernerlupput. Killilersuutaagallartut atuuttut naapertorlugit killilersuinerit ”katersuunnernut naalakkersuinikkut allatulluunniit isummersornissamik siunertalinnut atuutinngillat”. Tamannalu kattuffiit, timersoqatigiiffiit, atuakkiortut, nipilersortartut peqatigiiffiisa kulturip illorsuisa allallu ulluni qassiusuni KNR-ikkut isornartuissutigaat.

AAMMA ATUARUK Katuaq er frustreret over coronaregler: Vi forstår ikke hvad vi må og ikke må  

KNR-ip Naalakkersuisut siulittaasuat, Kim Kielsen (S) peqqissutsimullu naalakkersuisoq, Anna Wangenheim ulluni qassiusuni oqaaseqartinniarsarigaluarpai. KNR-imit malittarisassat qanoq paasineqassanersut kikkorpiaallu qanoq iliorsinnaanersut akissuterserusukkaluarparput – naallil qasseeriarluni tamanna apeqquteqaatigineqaraluartoq suli akissutersineqanngilaq.

Illuatungiliuttut maanna aamma akissuterserusupput:

- Killiffik attanneqarsinnaanngilaq. Tamannalu nunatsinni kattuffiit aamma nalaakkaat tusagassiorfitsigut takuusinnaavarput. Naatsumik oqaatigalugu, covid19-imik akiuiniarneq ataatsimoorfiunngilaq, ammasumik allakkaminni allapput.

Isornangaatsiartoq

- Naalakkersuisunut eqqaasissutigissavarput, upernaaq Inatsisartut Covid19-ip akiorniarlugu immikkut ittumik inatsisilioranni, Naalakkersuisunut pisinnaatitsissummik tunniussaqarnerminni piumasarimmassuk partiit qanimut aaliangiinerni peqataatinneqarlutillu tusarniarneqartassasut, illuatungiliuttut allapput.

- Tamanna pinngilaq Naalakkersuisullu Inatsisartut piumasaanut uniuuttumik maanna ingerlaleraluttuarlutik.  Tassami partiit siuttuisa naapittarneri aalajangeriikkanik saqqummiunneqaliivissunillu ilisimatitsinertut iluseqaannarmata.

Naalli aaqqissuussinernut peqataajartorluni kommuninut allanut angalanissaq inerteqqutaagaluartoq nunarput avataanit juulip qiteqqunnerani tikinneqarsinnaalerpoq.

AAMMA ATUARUK Frederik Elsner Ole K-lu coronamut malittarisassaqaraluartoq tusarnaartitsiartoqattaalersut: Akuerisaanikuuvugut

Tassa imaappoq nunatsinnut tikittut (Savalimmiuninngaanniit Islandimiillu maanna nunani mattussiviusunit tikittuunngikkunik) killilersuiffiunngillat. Tamannalu nipilersortartut angalasinnaanissaannut aporfiunerarlugu nipilersortartut kattuffiata isornartorsiorlugu KNR-imut oqaatiginikuuaa.

Illuatungiliuttut malittarisassat isumasiuminaatsikkaat:

- Nunatta avataaniit isaasut killilersugaanngitsumik ammaateriarlugit, nunatta iluani killilersuineq annertooq ernumagalugu aamma apuukkumavarput. Nunatsinnummi nunatta avataaniit isaanermi atassuteqarfigisatsinni, Danmarkimi tuniluunneq annertusiartupilooqqilernera eqqumaffigisariaqarparput, Inuit Ataqatigiit, Atassut, Partii Naleraq Suleqatigiissitsisullu allapput.

Ammasumik allagaq Inuit Ataqatigiit siulittaasuannit, Múte Borup Egedep, Partii Naleqqap siulittaasuanit Hans Enoksenimit, Atassutip siulittaasuanit Aqqalu Jerimiassenimit, Suleqatigiissitsisullu siulittaasuannit Tillie Martinussenimit atsiorneqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat